वैद्यकीय प्रवेशाची पहिली गुणवत्ता यादी जाहीर

मटा ऑनलाइन वृत्त। मुंबई

राज्याच्या वैद्यकीय अभ्यासक्रम (मेडिकल) प्रवेशाची सुधारित पहिली सर्वसाधारण गुणवत्ता यादी जाहीर करण्यात आली आहे. या पहिल्या यादीत ४९ हजार ८५६ विद्यार्थ्यांचा समावेश आहे. विद्यार्थ्यांच्या अधिवास प्रमाणपत्रांसंदर्भात (डोमिसाईल) काही समस्या निर्माण झाल्या होत्या. या सर्व कागदपत्रांची तपासणी करून त्यांत सुधारणा करण्यात आली आहे. त्यांनंतर ही सुधारित सर्वसाधारण गुणवत्ता यादी जाहीर करण्यात आली आहे.

कागदपत्रांची पडताळणी केल्यानंतर पहिल्या सर्वसाधारण यादीमधून एकूण ७६७ विद्यार्थ्यांना अपात्र ठरवण्यात आले आहेत. मागच्या यादीमध्ये ५० हजार ६२३ विद्यार्थ्यांचा समावेश होता. पहिल्या यादीत समावेश असलेले ४९ हजार ८५६ विद्यार्थी पुढील निवड यादीसाठी पात्र असणार आहेत.

या निवड यादीमधील विद्यार्थ्यांना आपापले कॉलेज कोणते असणार आहे याबाबत येत्या दोन दिवसांमध्ये माहिती दिली जाणार आहे.