स्वदेशी बनावटीची ‘कलवरी’ नौदलाकडे

म. टा. विशेष प्रतिनिधी, मुंबई

माझगाव गोदीत बांधण्यात आलेली स्वदेशी बनावटीची पहिली स्कॉर्पियन ‘कलवरी’ ही पाणबुडी गुरुवारी भारतीय नौदलाकडे सुपूर्द करण्यात आली.

फ्रान्सच्या ‘डीसीएनएस’ या कंपनीच्या सहकार्याने सहा पाणबुड्या निर्मितीचा प्रकल्प माझगाव गोदीने हाती घेतला आहे, त्यापैकी पहिली पाणबुडी माझगाव गोदीत बांधून पूर्ण झाली. तब्बल दोन दशकांनंतर भारतात पाणबुडी बांधणीच्या कामाला सुरुवात झाली आहे. ही पाणबुडी नौदलाकडे सुपूर्द केल्याने महत्त्वाच्या टप्प्याची पूर्तता झाली.



‘स्कॉर्पियन’विषयी गोपनीय माहिती फुटल्यानंतर हा प्रकल्प रेंगाळण्याची शक्यता वर्तविण्यात येत होती. ही पाणबुडी गेल्या वर्षीच पूर्ण होणे अपेक्षित होते, मात्र तिच्या विविध चाचण्यांमुळे विलंब झाल्याचे सांगण्यात येते.



दुसरी पाणबुडी ‘खंदेरी’ या वर्षी जानेवारीत बांधण्यास प्रारंभ झाला असून तिच्यावर सध्या कसून चाचणी सुरू आहे. तिसरी ‘करंज’ ही या वर्षाच्या अखेरीस बांधली जाणार आहे. आता लवकरच ‘कलवरी’ पाणबुडीचे रितसर कमिशनिंग अपेक्षित आहे.