नैसर्गिक प्रसुतीनंतर 'वन रुपी'ची तात्काळ सेवा

मटा ऑनलाइन वृत्त । मुंबई

सर्वसामान्य मुंबईकरांना आणि विशेषतः रेल्वेने प्रवास करणाऱ्यांना आरोग्य सेवा सुलभ आणि सहज मिळावी या शुद्ध हेतूने डॉ. राहुल घुले यांनी मुंबईतील रेल्वे स्टेशनवर सुरू केलेल्या 'वन रुपी क्लिनिक'ने आज एका महिलेला नैसर्गिक प्रसुतीनंतर सेवा पुरवली.

टिटवाळ्याहून दादरला जाताना ठाणे स्थानक येताच गुडियाला असह्य कळा सुरू झाल्या. अखेर तिच्या नवऱ्याने घाटकोपर स्थानकात उतरण्याचा निर्णय घेतला. स्टेशनवर उतरल्यावर तिची नैसर्गिक प्रसूती झाली व तिने अडीच किलो वजनाच्या मुलीला जन्म दिला. यानंतर या दोघींना वन रुपी क्लिनिकमध्ये नेण्यात आले. या क्लिनिकमध्ये डॉ. राहुल घुले, डॉ. सरिता यांनी लगेच प्रसूतीनंतरची वैद्यकीय सुविधा पुरविली. या महिलेनी एका गोंडस मुलीला जन्म दिला आहे. बाळ आणि आईची प्रकृती व्यवस्थित असून त्यांना जवळच्या राजावाडी रुग्णालयात पाठवल्याची माहिती डॉ. राहुल घुले यांनी 'मटा ऑनलाइन'शी बोलताना दिली.