मुंबई विद्यापीठ: पुन्हा ऑनलाइन नोंदणीदिव्य

पदवी प्रवेशासाठी पुन्हा एमकेसीएलची निवड

म. टा. प्रतिनिधी, मुंबई

मुंबई विद्यापीठाच्या प्रथम वर्ष पदवी प्रवेशासाठी अनलाइन प्रक्रियेकरिता विद्यापीठाने आधीच्या कंपनीऐवजी एमकेसीएलला पुन्हा कंत्राट दिल्याने पुन्हा एकदा ऑनलाइन नोंदणी करण्याचे दिव्य विद्यार्थ्यांसमोर उभे राहिले आहे. विद्यापीठाच्या या भोंगळ कारभाराचा फटका पुन्हा एकदा विद्यार्थ्यांना बसणार आहे.

विद्यापीठाची प्रवेश प्रक्रिया आणि परीक्षेसंबंधी कामे करणाऱ्या ‘एमकेसीएल’ कंपनीमुळे विद्यार्थ्यांना याआधीही नाहक त्रास सहन करावा लागला होता. त्यामुळे काही दिवसांपूर्वी विद्यापीठाने एमकेसीएलऐवजी नव्या कंपनीला कंत्राट दिले. मात्र त्यानंतर सोमवारी विद्यापीठाने एमकेसीएलला क्लीन चिट देत पुन्हा सेवेत घेतल्याची घोषणा केली. मुंबई विद्यापीठाच्या या निर्णयामुळे प्रवेश प्रक्रिया संपत आली असताना पुन्हा ‘एमकेसीएल’कडे रजिस्ट्रेशन करण्याचे निर्देश दिले आहेत. त्यामुळे कॉलेजांकडूनही विद्यार्थ्यांना पुन्हा नोंदणी करण्यास सांगितले जात आहे. त्यामुळे विद्यापीठाने या गोंधळावर तातडीने मार्ग काढावा आणि रजिस्ट्रेशची मुदत २० सप्टेंबरपर्यंत वाढवण्याची मागणी केली आहे. नोंदणीसाठी विद्यापीठाने नव्याने नेमलेल्या कंपनीने विद्यार्थ्यांना १० अंकी पर्मनंट रजिस्ट्रेशन नंबर (पीआरएन) दिला आहे, तर एमकेसीएलचा पीआरएन क्रमांक १६ अंकी आहे. त्यामुळे डाटा स्टोरेजमध्ये अडचणी येणार असून विद्यार्थ्यांना पुन्हा एमकेसीएलकडे नोंदणी करावी लागणार आहे.

प्रक्रियेत भ्रष्टाचार

याप्रकरणी युवा सेना आणि मनविसेने आक्रमक पवित्रा घेतला आहे, तर टेंडर काढून प्रवेश प्रक्रियेचे काम नव्या कंपनीकडे सोपवले असताना पुन्हा ‘एमकेसीएल’ला आणण्याच्या प्रक्रियेत भ्रष्टाचार झाल्याचा आरोप युवा सेनेने केला आहे. युवा सेना आणि मनविसेने सोमवारी कुलगुरू डॉ. संजय देशमुख यांची भेट घेत आपली नाराजी व्यक्त केली आहे.