कोळी महिलांचे आंदोलन मागे

म. टा. प्रतिनिधी, मुंबई

छत्रपती शिवाजी महाराज मंडई ३१ जुलैपर्यंत खाली करण्याच्या नोटिशीला विरोध म्हणून १ ऑगस्टला मुंबईतील सर्व मच्छिबाजार बंद ठेवण्यात येणार होते. कोळी महिला मासे कापण्याची हत्यारे घेऊन आंदोलन करणार होत्या. मात्र बुधवारी सायंकाळी महापालिका बाजार विभाग समितीच्या सहाय्यक आयुक्त संगीत हसनाळे यांनी नोटीस मागे घेत असल्याचे आश्वासन देत मच्छिमार महिलांना आंदोलन मागे घेण्यास सांगितले. त्यामुळे आज, गुरुवारी होणारे आंदोलन मागे घेत असल्याचे अखिल महाराष्ट्र मच्छिमार कृती समितीचे अध्यक्ष दामोदर तांडेल यांनी सांगितले.

मच्छिमारांना ऐरोली नाका येथे हालवण्यात येणार होते. त्यामुळे त्यामुळे १५ हजार मच्छिमार महिलांच्या उपजीविकेचे साधन नष्ट होण्याची भीती निर्माण झाली होती. याविरोधात १४ जुलैला झालेल्या मच्छिमार महिलांच्या बैठकीत कोयते घेऊन मंडई वाचवण्याचा निर्णय घेण्यात आला. या आंदोलनाच्या इशाऱ्यानंतर शिवसेना पक्षप्रमुख उद्धव ठाकरे आणि मनसे अध्यक्ष राज ठाकरे यांनी हा महापालिकेसोबत हा निर्णय मागे घेण्यासंदर्भात चर्चा केली होती. त्यानुसार बुधवारी सायंकाळी ५ वाजता आश्वासन मिळाल्यावर आंदोलन मागे घेण्यात आल्याचे जाहीर करण्यात आले.