​ उड्डाणपुलांची डागडुजी

वाहतुकीची समस्या निर्माण झाल्याने पृष्ठभागावर डांबरी थर

म. टा. खास प्रतिनिधी, मुंबई

मुंबईतील अनेक उड्डाणपुलांचे पृष्ठभाग खराब झाल्यामुळे संबंधित विभागांमध्ये वाहतुकीची समस्या निर्माण झाली आहे. त्यामुळे उड्डाणपुलांच्या पृष्ठभागाची डागडुजी करून त्यांचे डांबरीकरण करण्याचा निर्णय महापालिकेने घेतला आहे. डॉ. बाबासाहेब आंबेडकर मार्गावरील लालबाग उड्डाणपूल, शीव उड्डाणपूल तसेच चिंचपोकळी रेल्वे स्थानकाजवळील ऑर्थर रोड रेल्वे पुलाचे काम हाती घेऊन त्यावर मॅकेनाइज मास्टिकचा डांबरी थर चढवला जाणार आहे.

डॉ. बाबासाहेब आंबेडकर मार्गावरील संत ज्ञानेश्वर उड्डाणपूल ‘एमएमआरडीए’ने बांधला असून, नोव्हेंबर २०१२ मध्ये पालिकेकडे हस्तांतरित करण्यात आला आहे. पुलाच्या देखभालीचा हमी कालावधी संपुष्टात आल्यामुळे त्यावर पडलेले खड्डे तसेच काही ठिकाणी खराब झालेल्या भागाची दुरुस्ती करण्यात आली नव्हती. परिणामी वाहतुकीला मोठा अडथळा निर्माण होत आहे. त्यामुळे या पुलाची दुरुस्ती करण्याचा निर्णय पालिकेने घेतला आहे. स्टॅक कमिटीच्या शिफारशीनुसार, मॅकेनाइज मास्टिकचा वापर यासाठी करण्यात येणार आहे. या पुलाच्या कामांसाठी १२.४६ कोटी खर्च केले जाणार आहेत.

चिंचपोकळी स्थानक येथील ऑर्थर रोड रेल्वे मार्गावरील पूल तसेच डॉ. बाबासाहेब आंबेडकर मार्गावरील शीव रुग्णालयासमोरील उड्डाणपुलावरही पावसामुळे खड्डे पडले असून, काही भाग खराब झाला आहे. या दोन्ही पुलांचीही कामे हाती घेण्यात येत आहेत. या दोन्ही पुलांसाठी ३.९३ कोटी खर्च केले जाणार आहेत. स्थायी समितीच्या मान्यतेनंतर या कामांना सुरुवात होऊन मुंबईकरांना हे पूल वाहतुकीसाठी खुले होती, अशी माहिती स्थायी समितीचे अध्यक्ष शैलेश फणसे यांनी दिली.

कर्नाक बंदर उड्डाणपूल
मस्जिद बंदर येथील १४५ वर्षे जुना कर्नाक बंदर उड्डाणपूल धोकादायक ठरल्यामुळे पालिकेने तो रेल्वेच्या मदतीने पाडला आहे. पूल पाडल्यानंतर मस्जिद बंदर पूर्व व पश्चिम दिशेचा संपर्क तुटला असून नागरिकांना दुसऱ्या मार्गाने जावे लागते. या रखडलेल्या पुलाचेही काम मार्गी लागले असून यासाठी ५३.०८ कोटी खर्च केले जाणार आहेत. एकूण १५० मीटर लांबी आणि २६.५ मीटर रुंदीच्या या उड्डाणपुलाचे स्टील गर्डर, पीएससी गर्डर व आरसीसी डेक स्लॅबचे बांधकाम केले जाणार आहे.