शाळा विषबाधेच्या चौकशीचे आदेश

मुंबई ः जोगेश्वरी पूर्वेकडील बालविकास विद्यामंदिरातील विद्यार्थ्यांना पोषण आहारातून झालेल्या विषबाधा प्रकरणाची सखोल चौकशी करून दोषींवर कारवाई करण्याचे निर्देश उच्च व तंत्रशिक्षण आणि गृहनिर्माण राज्यमंत्री रविंद्र वायकर यांनी संबंधितांना दिले आहेत.

१३ डिसेंबर रोजी शालेय पोषण आहारात देण्यात आलेली खिचडी खाल्ल्याने सुमारे ३८ विद्यार्थ्यांना विषबाधा झाली होती. या घटनेनंतर शनिवारी सकाळी वायकर यांनी शाळेला भेट देऊन, संबंधितांशी या घटनेची चर्चा केली.

या घटनेनंतर दोन मुलांच्या पोटांतील अन्नाचे नमुने, सातही डब्यातील खिचडीचे नमुने घेण्यात आले असून, ते नमुने तपासणीसाठी कालिना प्रयोगशाळेत पाठविण्यात आले आहेत. त्याचबरोबर अन्न व औषध भेसळ प्रतिबंधक विभागानेही तपासणीसाठी नमुने घेतले आहेत. गोडाऊनमधील धान्याचे नमुनेही घेण्यात आल्याची माहिती मेघवाडी पोलिस ठाण्याचे वरिष्ठ पोलिस निरीक्षक पांडुरंग पाटील यांनी राज्यमंत्र्यांना दिली.

या विद्यार्थ्यांना उपचारासाठी तातडीने रुग्णालयात दाखल करण्याची समयसूचकता दाखविणाऱ्या सर्वांचेे सुधार समितीचे अध्यक्ष बाळा नर यांनी आभार मानले. यावेळी पालिका शिक्षण समितीच्या अध्यक्ष शुभदा गुडेकरही उपस्थित होत्या.