आयटीआयची प्रवेश प्रक्रिया

विविध तांत्रिक कौशल्ये‌ शिकण्यासाठी आयटीआयच्या अभ्यासक्रमांना अनेक विद्यार्थी पसंती देतात. या अभ्यासक्रमाची प्रवेश प्रक्रिया सुरू होत आहे. त्यापूर्वी खालील बाबी अवश्य ध्यानात घ्यायला हव्यात.

■ आयटीआय प्रवेशाची माहितीपुस्तिका सर्वत्र उपलब्ध आहेत. ती नीट वाचून ही प्रवेश प्रक्रिया समजून घ्यावी.

■ admission.dvet.gov.in या वेबसाइटवर जाऊन आपली प्राथमिक माहिती भरून ऑनलाइन प्रवेश अर्ज भरण्यास सुरुवात करावी. प्रवेश अर्ज भरल्यावर त्याची प्रिंट काढावी.

■ प्रवेश अर्जाची प्रिंट, विविध कागदपत्रांच्या छायांकित प्रत आणि मूळ कागदपत्रे आणि अर्ज शुल्क आदी गोष्टी महाराष्ट्रातल्या कोणत्याही आयटीआयमध्ये सादर करत प्रवेश अर्ज निश्चित करावा.

■ अर्ज निश्चित झाल्यावर आयटीआयमध्ये 'अॅप्ल‌किेशन कान्फर्मेशन रिसीट' दिली जाते.

■ प्रवेश अर्ज निश्चित झाल्यावर पहिल्या प्रवेश फेरीसाठी ऑप्शन कोड देता येतील.

■ त्यानंतर प्राथमिक गुणवत्ता यादी जाहीर करण्यात येईल. त्याबाबत हरकती असल्यास नजीकच्या आयटीआयमध्ये जाऊन लेखी स्वरूपात हरकत नोंदवावी.

■ पहिल्या प्रवेश फेरीमध्ये कुठे प्रवेश मिळाला, हे वेबसाइटवर जाहीर करण्यात येईल. त्यानंतर विद्यार्थी दिलेल्या मुदतीमध्ये तिथे जाऊन आपला प्रवेश निश्चित करू शकतात.

■ निवड न झालेल्या किंवा प्रवेश न घेतलेल्या विद्यार्थ्यांना पुन्हा ऑप्शन कोड देत प्रवेश प्रक्रियेमध्ये सामावून घेतले जाते. प्रवेश फेरी दोन ते चार यासाठी ते अर्ज करू शकतात.

■ चौथ्या प्रवेश फेरीनंतर कुठेही प्रवेश निश्चित न केलेल्या किंवा प्रवेश न मिळालेल्या विद्यार्थ्यांसाठी पाचवी आणि सहावी समुपदेशनाची फेरी घेण्यात येते. विद्यार्थ्याला प्रत्यक्ष आयटीआयमध्ये जाऊन प्रवेश प्रक्रियेला सामोरे जावे लागेल. गुणवत्ता यादीतील त्याच्या स्टेट मेरीट नंबरनुसार प्रत्येकाला समुपदेशनासाठी बोलावून प्रवेश दिले जातील.