फेसबुकवरील मैत्री पडली साडेचार लाखांना

भांडुपमधील ५१ वर्षीय महिलेची फसवणूक

म. टा. खास प्रतिनिधी, मुंबई

फेसबुकवर अनोळखी व्यक्तीसोबत मैत्री करणे भांडुपमधील ५१ वर्षीय महिलेला चांगेलच महागात पडले आहे. मित्र झालेल्या दोन अनोळखी इसमांनी या महिलेला साडेचार लाखांचा गंडा घातला आहे. याप्रकरणी या महिलेने भांडुप पोलिस ठाण्यात तक्रार केली असून पोलिस ठगांचा शोध घेत आहेत.

मुलुंड-गोरेगाव लिंक रोडवरील सोसायटीमध्ये राहणाऱ्या महिलेच्या फेसबुक अकाउंटवर जुलै महिन्यात एक फ्रेंड रिक्वेस्ट आली. ऑस्कर रोनाल्ड नावाच्या व्यक्तीने ही रिक्वेस्ट पाठवली होती. या महिलेने ही अनोळखी रिक्वेस्ट स्वीकारली. रोनाल्ड आणि ही महिला यांच्यात चांगली मैत्री झाली. ते दोघे मेसेंजरवर तासनतास बोलू लागले. विचारपूस करताना रोनाल्ड याने आपण कॅनेडियन नागरिक असल्याचे सांगितले. पहिल्यांदात भारतीय अनोळखी व्यक्तीशी इतका बोलत असून तुमचा प्रेमळ स्वभाव आवडल्यामुळे एक महागडे गिफ्ट पाठवत असल्याचे रोनाल्ड याने महिलेला सांगितले.

गिफ्ट पाठविल्याचे सांगितल्यानंतर दोन दिवसांनी जेठीया मिश्रा याने या महिलेला फोन केला. विमानतळावरील कस्टमच्या कार्यालयातून बोलत असून तुमचे गिफ्ट महागडे असल्याने त्यासाठी पैसे भरावे लागतील असे मिश्रा याने सांगितले. पैसे भरण्यासाठी येण्याची गरज नाही तुम्ही परस्पर बँक खात्यावरही पैसे भरू शकता. परदेशातून गिफ्ट आल्याने या महिला पैसे भरण्यास तयार झाली. मिश्रा याने दिलेल्या खात्यावर आधी २५ हजार आणि नंतर टप्प्याटप्प्याने ४ लाख ४० हजार रुपये या महिलेने भरले. इतके पैसे भरूनही मिश्रा अधिक पैशांची मागणी करू लागला. संशय आल्याने या महिलेने रोनाल्डशी संपर्क साधण्याचा प्रयत्न केला असता त्याचा मोबाइल बंद होता. त्यानंतर मिश्रा यानेही मोबाइल बंद केला. आपली फसवणूक झाल्याचे लक्षात आल्यानंतर महिलेने भांडुप पोलिस ठाण्यात तक्रार केली.