रेल्वेच्या वायफायचा कॅन्सरग्रस्तांना उपयोग

मटा ऑनलाइन वृत्त । मुंबई

रेल्वे मंत्रालयाच्यावतीने काही स्थानकांमध्ये प्रवाशांसाठी मोफत वायफायची सुविधा उपलब्ध करून दिली आहे. हीच वायफायची सुविधा कॅन्सरग्रस्त रुग्ण आणि त्यांच्या नातेवाईकांच्या उपयोगी येत आहे. दादर रेल्वे स्थानकात असलेल्या वायफायचा वापर रुग्ण आणि त्यांचे नातेवाईक विरंगुळ्यासाठी करत आहेत.

परळ येथील टाटा कॅन्सर हॉस्पिटलमध्ये देशभरातील विविध ठिकाणाहून उपचारासाठी कॅन्सरचे रूग्ण येतात. परळ आणि दादरमध्ये असणाऱ्या धर्मशाळा, बोर्डिंग हाऊसमध्ये रुग्ण, त्यांचे नातेवाईक वास्तव्यास असतात. रूग्णालयातील दगदग, उपचारादरम्यान होणारा त्रास आणि घरच्यांची येणारी आठवण यावर मात करण्यासाठी काही रुग्णांच्या नातेवाईकांनी रेल्वे स्थानकाच्या वायफाय सेवेचा आधार घेतला आहे. रेल्वे स्थानकातील वायफाय सुविधा मोफत आहे. आपला मोबाइल क्रमांक रजिस्टर केल्यानंतर वायफाय सेवेचा सुविधेचा लाभ घेता येतो. बिहारमधून आपल्या आईच्या उपचारासाठी आलेल्या रणजित कुमारने याने सांगितले की, आईवर रुग्णालयात उपचार सुरू आहेत. त्यामुळे भीती आणि दडपण आहे. वायफाय वापरून काही कार्यक्रम मोबाइलवर पाहतो त्यामुळे थोडावेळ का होईना तणावापासून दूर राहतो. तर, टाटा रुग्णालयात हाडाच्या कर्करोगावर उपचार घेत असलेल्या यवतमाळमधील कृष्णा शिनगारेलादेखील उपचारांच्या वेदनेपासून दूर राहण्यासाठी रेल्वेच्या वायफायचा आधार वाटतो. मोबाइलद्वारे युट्यूबवर असलेले व्हिडिओ पाहून कृष्णा मानसिकदृष्ट्या अधिक कणखर बनतोय. मनोरंजन, विरंगुळ्यासाठी दुसरा काहीच आधार नसल्यामुळे वायफायचा आधार असल्याचे कृष्णाने म्हंटले.