रविवारपासून इंधन तुटवडा?

पेट्रोल, डिझेल खरेदी बंद केल्याने झळ बसण्याची शक्यता

म. टा. खास प्रतिनिधी, मुंबई

पेट्रोल पंप चालकांच्या प्रलंबित मागण्यांसाठी अनेक दिवसांपासून सुरू असलेल्या संघर्षातून बुधवारी एका दिवसासाठी प्रतिकात्मकरित्या पेट्रोल डिझेल खरेदी बंद करण्यात आली. त्यामुळे वाहनचालकांना समस्या निर्माण झाली नसली तरीही रविवार, १४ मे पासून इंधनाचा तुटवडा भासण्याची भीती आहे. मुंबईसह परिसरातील पेट्रोल पंप चालकांनी बुधवारी एका दिवसापुरता इंधनाची खरेदी न करण्याचे धोरण स्वीकारले. मात्र, हा केवळ इशारा असून पुढील आठवड्यापासून इंधन तुटवड्याची झळ बसणार असल्याची भीती आहे.

पेट्रोल पंप चालकांनी अपूर्व चंद्र कमिटीच्या शिफारसींप्रमाणे अन्य प्रलंबित मागण्यांसाठी पाठपुरावा सुरू केला आहे. कमिशन वाढविण्यासह विविध मागण्यांचा त्यात समावेश आहे. त्याचा भाग म्हणून बुधवारी पेट्रोल पंपचालकांनी ‘नो पर्चेस डे’ची घोषणा करत पेट्रोल-डिझेल खरेदी केलेली नाही. पण पंप चालकांकडे किमान दोन ते तीन दिवसांसाठी पुरेल इतका साठा असल्याने टंचाई निर्माण झाली नाही. मात्र, रविवार १४ मे पासून पंप चालक आंदोलन तीव्र करणार आहेत.

रविवारपासून परिणाम

रविवार, १४ मे पासून दर रविवारी साप्ताहिक सुटीवर जाण्यासह त्यानंतर सकाळी ९ ते सायंकाळी ६ या एकाच पाळीत काम करण्याचा इशाराही पेट्रोल डीलर्स असोसिएशनने दिला आहे. विविध प्रलंबित मागण्यासाठी सरकारकडून प्रतिसाद मिळत नसल्याने पेट्रोल पंप मालकांनी दर रविवारी पेट्रोल पंप बंद ठेवण्याचा इशारा दिला आहे. पेट्रोल पंप कधीही बंद नसतात. पण केंद्र सरकारकडून कमिशनमध्ये वाढ केली जात नसल्याने दर रविवारी साप्ताहिक सुट्टी घेण्याचा मानस व्यक्त केला आहे. हा निर्णय ठाम राहिल्यास १४ मे रोजी रविवार असल्याने पेट्रोल पंपांवरील कर्मचाऱ्यांना सुट्टी देण्यात येईल आणि यानंतरच्या प्रत्येक रविवारी पेट्रोल पंप बंद ठेवण्याचा इशारा पेट्रोल पंप चालकांनी दिला आहे.