संजय दत्तची पार्टी पोलिसांनी रोखली

मटा ऑनलाइन वृत्त । मुंबई

पुण्याच्या येरवडा जेलमध्ये शिक्षा भोगून नुकताच बाहेर पडलेला अभिनेता संजय दत्त पुन्हा एकदा वादात सापडला आहे. संजय आणि मान्यता दत्त यांनी वांद्रे-पाली हिल येथील ते राहत असलेल्या 'इंपेरियल हाइट्स' बिल्डिंगच्या टेरेसवर मित्रांसाठी पार्टी ठेऊन पहाटेपर्यंत सेलिब्रेशन केल्याने शेजारी राहणाऱ्या रहिवाशांची झोप उडाली. विशेष म्हणजे पोलीस आल्यानंतर पहाटे चार वाजता ही पार्टी थांबवण्यात आली.

गेल्या आठवड्यातील ही घटना आहे. संजय दत्तच्या 'इंपेरियल हाइट्स' बिल्डिंगच्या बाजूच्या बिल्डिंगमध्ये राहणाऱ्या डॉ. अमिताभ शुक्ला आणि डॉ. छाया शुक्ला या दाम्पत्याने या पहाटेपर्यंत चाललेल्या पार्टीबाबत पोलिसांना माहिती दिली. डॉ. छाया जसलोक हॉस्पिटलच्या भूलतज्ञ आहेत तर अमिताभ शुक्ला हे पाली हिल रेसिडंट्स असोसिएशनचे चेअरमन आहेत. टेरेसवर पार्टी ठेवण्याबद्दल आम्हाला कोणतीच हरकत नव्हती. रात्री २.१५ वाजेपर्यंत सगळं काही सुरळीत होतं. मात्र त्यानंतर अचानक मोठ्या आवाजात म्युजिक लावण्यात आले. त्याने आमची झोपच उडाली आणि नाईलाजाने शेवटी आम्ही पोलिसांना फोन केला, असे शुक्ला दाम्पत्याने सांगितले. तक्रार मिळाल्यानंतर पोलीस काहीवेळातच संजय दत्तच्या बिल्डिंगमध्ये दाखल झाले. पहाटे चारच्या सुमारास पोलिसांनी पार्टी थांबवली आणि त्यानंतर सगळा परिसर शांत झाला, असे शुक्ला दाम्पत्याने 'स्पॉटबॉयई डॉट कॉम' (spotboye.com) या एंटरटेनमेंट वेबसाइटला सांगितले.

...तरीही सुधारणा नाही

संजय दत्त जेलमध्ये जाण्याआधीही ही समस्या होती. त्याला वारंवार याबद्दल सांगण्यातही आलं. मात्र, कोणतीच सुधारणा झाली नाही. संजयच नाही तर या भागात राहणाऱ्या अनेक सेलिब्रिटींच्या घरातही अशाप्रकारे रात्रभर पार्ट्या सुरू असतात. त्या सर्वांना पत्र लिहिण्यात आलं आहे. सेलिब्रिटी हे आयकॉन असतात. त्यांनी आपल्या वागण्यातून इतरांपुढे आदर्श ठेवायला हवा, अशी अपेक्षा त्या पत्रात व्यक्त करण्यात आली आहे, अशी माहितीही डॉ. अमिताभ शुक्ला यांनी दिली.