गडचिरोलीचे पालकमंत्रिपद पुन्हा एकनाथ शिंदेंकडे

म. टा. विशेष प्रतिनिधी, मुंबई

करोना संकटाच्या पार्श्वभूमीवर गडचिरोली जिल्ह्याच्या पालकमंत्रिपदाचा अतिरिक्त कार्यभार इतर मागासवर्ग विभागाचे मंत्री विजय वडेट्टीवार यांच्याकडून काढून या जिल्ह्याचे पालकमंत्रिपद पुन्हा नगरविकासमंत्री एकनाथ शिंदे यांच्याकडे सोपवण्यात आले आहे.

करोनाच्या संकटात शिंदे यांच्याकडील गडचिरोली जिल्ह्याचे पालकमंत्रिपद १५ मे रोजी वडेट्टीवार यांच्याकडे देण्यात आले होते. त्यांच्याकडे हा कार्यभार तात्पुरता स्वरूपाचा होता. परंतु सामान्य प्रशासन विभागाने गुरुवारी शासन निर्णय जारी केला आहे. यात वडेट्टीवार यांच्याकडील अतिरिक्त कार्यभार संपुष्टात आला असल्याचे स्पष्ट केले आहे, तर पुन्हा गडचिरोली जिल्ह्याचे पालकमंत्रिपद शिंदे यांच्याकडे सोपवण्यात आले आहे.