ऑर्थर रोड कारागृहात गँगवार, ५ जखमी

मटा ऑनलाइन वृत्त । मुंबई

मुंबईतील ऑर्थर रोड तुरुंगात कैद्यांच्या दोन गटांमध्ये तुंबळ हाणामारी झाली असून कैद्यांनी एकमेकांवर सशस्त्र हल्ले केल्याची माहिती हाती आली आहे. हल्ल्यात पाचजण जखमी झाले असून त्यांना उपचारासाठी जे. जे. रुग्णालयात दाखल करण्यात आलं आहे.

ऑर्थर रोड तुरुंगात शिक्षा भोगत असलेल्या मुस्तफा डोसा व पप्या गँगच्या लोकांमध्ये ही हाणामारी झाली. या हाणामारीत अॅल्युमिनियमपासून बनविण्यात आलेल्या कापरीचा वापर करण्यात आला. मात्र, ही शस्त्रे बाहेरून आणली गेली नसून तुरुंगातीलच भांडी व चमचे यांचा शस्त्रासारखा वापर करण्यात आल्याचं सांगितलं जातं.

अधिकृत माहितीनुसार, मुदस्सर इस्माइल अन्सारी, सरवर मकसूद खान, सुलेमान मेहमूद पटेल या तिघांनी विशाल आमकर व मुरुगन नाडर यांच्यावर कापरीनं हल्ला केला. यात आमकर व मुदस्सर याच्या छातीवर व पायावर जखमा झाल्या आहेत, तर मुदस्सरच्या डोक्याला मार लागला आहे. त्यानं स्वत:हून मनगट कापून घेतल्याचं बोललं जातं. याप्रकरणी ना. म. जोशी मार्ग पोलीस ठाण्यात गुन्हा दाखल करण्यात आला आहे.