दारूला महिलांची नावं; गिरीश महाजनांचा माफीनामा

मटा ऑनलाइन वृत्त । मुंबई

दारूला महिलांची नाव देण्याचा सल्ला कारखान्यांना देणारे राज्याचे जलसंपदा मंत्री गिरीश महाजन यांनी आपल्या वक्तव्याबद्दल जाहीर माफी मागितली आहे. 'विनोदाच्या अंगानं मी हे वक्तव्य केलं होतं. महिलांचा अपमान करण्याचा कुठलाही हेतू नव्हता,' असं त्यांनी स्पष्ट केलं आहे. नंदुरबार जिल्ह्यातील शहादा येथील सातपुडा साखर कारखान्याच्या गाळप हंगामाच्या शुभारंभाप्रसंगी महाजन यांनी हे वादग्रस्त वक्तव्य केलं होतं.

नेमकं काय म्हणाले होते महाजन?

'राज्यात सर्वाधिक देशी दारूची विक्री कोपरगावचे नेते शंकरराव काळे यांच्या कारखान्याची होत असते. त्यांच्या कारखान्यात बनविल्या जाणाऱ्या दारूचे नाव ‘भिंगरी’ आहे. तर माजी आमदार कोल्हे यांच्या कारखान्यातर्फे निर्माण होणाऱ्या मद्याचे नाव ‘ज्युली’ असं आहे. त्याचप्रमाणे बाजारात ज्या उत्पादनांना महिलांचे नाव दिले आहे. त्यांची विक्री अधिक होते, ही वस्तुस्थिती आहे. तंबाखूजन्य पदार्थांनाही विमल, सुमन अशी बहुतांशी महिलांचीच आहेत. त्यामुळं सातपुडा साखर कारखान्याने मद्य विक्री वाढवण्यासाठी दारूचं नाव ‘महाराजा’ ऐवजी ‘महाराणी’ करावे.”, असं महाजन म्हणाले होते.