समाजस्वास्थ्य नाटकाचा सुवर्णमहोत्सवी प्रयोग

मुंबई : समाजस्वास्थ्य या र. धों. कर्वे यांच्या कार्याची ओळख करून देणाऱ्या नाटकाने सुवर्णमहोत्सवी वाटचाल केली असून, नाटकाचा ५०वा प्रयोग मुंबईत आयोजित करण्यात आला आहे. समाजस्वास्थ्यचा १८ नोव्हेंबरला माटुंग्याच्या यशवंत नाट्यमंदिर येथे होणारा प्रयोग महाराष्ट्रात अनेक दशके कार्यरत असणाऱ्या राष्ट्र सेवा दल, अंधश्रद्धा निर्मूलन समिती आणि सर्वहारा जन आंदोलन या संघटनांच्या मदतीसाठी होणार आहे. तसेच २६ नोव्हेंबरच्या संविधान जागर यात्रेसाठीही या माध्यमातून मदत उभी केली जाणार आहे.

समाजस्वास्थ्य हे नाटक २०व्या शतकातील प्रस्थापित मानसिकतेवर प्रहार तर करतेच, पण आजच्या काळावरदेखील भाष्य करते. सद्यस्थितीत विषम उतरंडीची व्यवस्था पुनःजीवित होण्याची शक्यता असताना हे नाटक प्रगतीशील मूल्यांची मांडणी करते. अजित दळवीलिखित आणि अतुल पेठेदिग्दर्शित या नाटकाला राज्यभरात विविध ठिकाणांहून चांगला प्रतिसाद लाभला आहे. यावेळी अभिनेते नासिरुद्दीन शहा, रत्ना पाठक-शहा, गूढकथाकार रत्नाकर मतकरी, ज्येष्ठ पत्रकार कुमार केतकर, ज्येष्ठ पत्रकार-नाटककार जयंत पवार, कवी किशोर कदम आदी उपस्थित राहणार आहेत. संपर्क : उल्का महाजन – ९८६९२३२४७८.