म्हाडा लॉटरीला चांगला प्रतिसाद

म. टा. विशेष प्रतिनिधी, मुंबई

म्हाडाच्या लॉटरीला सुरवातीच्या काळातच अपेक्षेपेक्षा अधिक चांगला प्रतिसाद मिळत आहे. आतापर्यंत नऊ हजारांहून अधिक इच्छुकांनी घरांसाठी अर्ज केले आहेत.

म्हाडाच्या यंदाच्या लॉटरीत ८१९ घरे आहेत. या घरांसाठी अर्ज करण्यापूर्वी प्रत्येक इच्छुकाला ऑनलाइन नोंदणी करावी लागते. मागील शनिवारी ऑनलाइन नोंदणीला सुरवात झाली तर रविवारपासून अर्ज स्वीकारण्यास सुरवात झाली आहे. अर्जही ऑनलाइन करावे लागत आहेत. या घरांसाठी आतापर्यंत १६ हजारांहून अधिक इच्छुकांनी नोंदणी केली आहे. तर शुक्रवारी संध्याकाळी साडे चारपर्यंत ९ हजार २८१ अर्ज आले आहेत.

मागील वर्षी म्हाडाच्या घरांसाठी तब्बल १ लाख ३६ हजार अर्ज आले होते. यंदाही लॉटरीला चांगला प्रतिसाद मिळेल अशी म्हाडाची अपेक्षा आहे. या संदर्भात म्हाडाच्या मुंबई मंडळाचे मुख्य अधिकारी सुभाष लाखे म्हणाले की, म्हाडावर सर्वसमान्यांचा प्रचंड विश्वास आहे. खासगीच्या तुलनेत म्हाडाच्या घरांचे दरही कमी आहेत. त्यामुळे यंदाही लॉटरीला जोरदार प्रतिसाद मिळेल अशी अपेक्षा त्यांनी व्यक्त केली.