(फोटो मेल केला आहे.)
...............................
गोरेगाव स्थानकाजवळ रेल्वे रुळाला तडा
म. टा. प्रतिनिधी, मुंबई
गोरेगाव आणि राममंदिर स्थानकादरम्यान रेल्वे रुळाला तडा गेल्यामुळे जलद मार्गावरील वाहतूक खोळंबली होती. अंगारकी चतुर्थी आणि नाताळनिमित्त बाहेर घराबाहेर पडणाऱ्या मुंबईकरांना या खोळंब्यामुळे नाहक मनस्ताप सहन करावा लागला. या गोंधळामुळे पश्चिम रेल्वेवरील अप आणि डाऊन मार्गावरील जलद लोकल सुमारे १५ ते २० मिनिटे उशिराने धावत होत्या.
अंगारकीनिमित्त सिद्धिविनायक तर नाताळनिमित्त वांद्रे येथील माऊंट मेरी चर्चमध्ये मंगळवारी पहाटेपासून मुंबईकरांनी रांग लावण्यास सुरुवात केली. गोरेगाव स्थानकाजवळ सकाळी साडे नऊच्या सुमारास अप जलद मार्गावरील रेल्वे रुळाला तडा गेला. बहुतांशी कार्यालयांना सुट्टी असल्यामुळे नोकरदार वर्गाची गर्दी कमी होती. मात्र सुट्टीचा आनंद द्विगुणित करण्यासाठी कुटुंबीयांसोबत घराबाहेर पडणाऱ्या मुंबईकरांना या गोंधळामुळे चांगलाच फटका बसला. अर्ध्या तासानंतर दुरुस्ती काम पूर्ण केल्यानंतर पश्चिम रेल्वेची जलद मार्गावरील वाहतूक पूर्वपदावर आली. तत्पूर्वी लोकल फेऱ्यांना सुमारे २० मिनिटांचा लेटमार्क लागल्यामुळे ऐन सुट्टीतही मुंबईकरांना लोकलपीडा सहन कराव्या लागल्या.
मध्य रेल्वेवर नाताळ सुट्टीनिमित्त मंगळवारी रविवार विशेष वेळापत्रक लागू करण्यात आल्यामुळे बहुतांश लोकल फेऱ्या रद्द करण्यात आल्या होत्या. लोकल रद्द करण्यात आल्याच्या, किंबहुना रविवार विशेष लोकल वेळापत्रक चालवण्याबाबतच्या कोणत्याही उद्घोषणा स्थानकांवर करण्यात न आल्याने प्रवाशांमध्ये गोंधळाचे वातावरण होते.