पुनर्विकासाला ‘ग्रीन सिग्नल’

मुंबईसह देशभरातील ४०० प्रमुख स्थानकांचा पुनर्विकास करण्यास रेल्वे बोर्डाने अखेर मंजुरी दिली असून, त्यामुळे मुंबईतील पश्चिम आणि मध्य रेल्वेवरील १५ स्थानकांचा चेहरामोहरा बदलणार आहे. मुंबई रेल्वे विकास महांमडळातर्फे (एमआरव्हीसी) स्थानकांच्या पुनर्विकासाचे उद्द‌िष्ट साध्य केले जाणार आहे.

मुंबई महानगर वाहतूक प्रकल्प (एमयूटीपी-३) अंतर्गत महामंडळाने सुरुवातीला २१ स्थानकांचा पुनर्विकास करण्याचे ठरवले होते. परंतु, त्या यादीसाठी रेल्वे बोर्डाकडून नकारघंटा मिळाल्यानंतर स्थानकांची संख्या २१वरून १५ करण्यात आली आहे. स्थानकांच्या पुनर्विकासाचे नेमके स्वरूप, आढावा याबाबत महामंडळास संपूर्ण अधिकार मिळाल्यानंतर पुनर्विकासाचा आराखडा तयार केला जाणार आहे.

असा होईल पुनर्विकास…

- १५ स्थानकांच्या पु‌नर्विकासात सहभागी होणाऱ्या​ विकासकांना या स्थानकांच्या प्लॅटफॉर्मवर कोणतेही वेगळे बांधकाम करू दिले जाणार नाही. मात्र, विकसित झालेल्या स्थानक परिसरात कोणताही अधिकृत व्यवसाय करण्याची संमती दिली जाईल.

- विकासकांना मोकळ्या जागांप्रमाणेच तिकीट आरक्षण केंद्राशेजारील जागा उपलब्ध करून दिली जाणार आहे.

- विकासकांना व्यावसायिक दुकाने, खासगी क्लासेस आदींसाठी त्या प्रमाणात एफएसआय मिळण्याची तरतूदही केली जाणार आहे.

- स्थानकाचे स्वरूप बदलताना रेल्वे प्रवासी, रेल्वे वाहतुकीस बाधा आणणारी कोणतीही कृती विकासकांकडून अपेक्षित नाही.

- स्थानक, प्लॅटफॉर्म, स्थानकाचा परिसर, तिकीट केंद्र, प्रवासी सुविधा, सौंदर्य राखत पुनर्विकास साधण्यावर भर दिला जाणार आहे.

- खासगी गुंतवणुकीच्या सहभागातून स्थानकांचा विकास साधला जातानाच रेल्वेवर कोणताही आर्थिक भार पडणार नाही याची दक्षता घेतली जात आहे.