निवासी बांधकामांना ‘बीकेसी’त परवानगी

निवासी बांधकामांना ‘बीकेसी’त परवानगी

jayant.howal@gmail.com

मुंबई: वांद्रे-कुर्ला संकुलातील (बीकेसी) व्यावसायिक बांधकामासाठी राखीव ठेवण्यात येणाऱ्या भूखंडांवर ३० टक्के निवासी बांधकाम करण्यास परवानगी देण्याचा निर्णय अखेरीस एमएमआरडीएने घेतला आहे. ही जागा खरेदी करणाऱ्या विकासकावर विशिष्ट घटकांसाठी घरे बांधण्याचे कोणतेही बंधन नसल्यामुळे बिल्डर संकुलात कोट्यवधी रुपये किमतीची घरे बांधण्याची चिन्हे आहेत.

एमएमआरडीएच्या ‘नगर व क्षेत्र नियोजन’ विभागाने डीसीआर नियमाच्या कलम ३७ अंतर्गत प्रक्रियेला यासंदर्भात सुरुवात केली आहे. ही प्रक्रिया पूर्ण झाल्यानंतर सूचना व हरकती मागवल्या जातील व त्यानंतर हा अहवाल अंतिम मंजुरीसाठी राज्य सरकारला सादर होईल. हा प्रस्ताव मंजूर झाल्यास निवासी बांधकाम करणाऱ्या बिल्डर वा विकासकांवर अमूक एका वर्गासाठी घरे बांधण्याचे कोणतेही बंधन नसेल. साहजिकच या भागात कोटींची उड्डाणे करणारे ग्राहकच घर घेतील हे स्पष्ट होत आहे.

निवासी बांधकामासाठी सरकार सकारात्मक

काही महिन्यांपूर्वी मुख्यमंत्री देवेंद्र फडणवीस यांच्या अध्यक्षतेखाली पार पडलेल्या एमएमआरडीच्या बैठकीत बीकेसीतील व्यावसायिक भूखंडावर निवासी बांधकामे करण्यास परवानगी मिळावी, अशी मागणी झाली होती. त्यावर यासंदर्भात सकारात्मक प्रतिसाद देण्यात आला होता. साहजिकच राज्य सरकारने हिरवा कंदील दाखवल्यामुळेच एमएमआरडीएने एक पाऊल पुढे टाकले आहे.

संकुलात राष्ट्रीय-आंतरराष्ट्रीय अशा खासगी संस्थांची तसेच सरकारी कार्यालये मोठ्या प्रमाणावर आहेत. त्या तुलनेत निवासी संकुले फारच कमी आहेत. साहजिकच संध्याकाळी हा भाग निर्मनुष्य असतो. या भागात निवासी संकुलेही झाली, तर याच ठिकाणी काम करणाऱ्या लोकांच्या ते सोयीचे ठरेल. त्या निमित्ताने संकुलाला एक प्रकारचा जिवंतपणा येईल. न्यूयॉर्कसारख्या

शहरात व्यावसायिक बांधकामांबरोबरच निवासी बांधकामेही मोठ्या प्रमाणावर आहेत.

बिझनेस हबच्या ठिकाणी निवासी बांधकामे उभी करू देण्याचा निर्णय अनाकलनीय आहे. जगात कुठेही अशा प्रकारच्या हबमध्ये निवासी बांधकामे नसतात- चंद्रशेखर प्रभू, शहर नियोजनतज्ज्ञ.