श्रीमंत मतदारसंघात नवीन उमेदवार
..
मुंबईच्या दक्षिण टोकावरील कुलाबा हा राज्यातील सर्वात श्रीमंत मतदारसंघ. ब्रिटीशकालीन ऐतिहासिक वास्तुंपासून ते सरकारी वसाहती तसेच नव्याने उभ्या राहिलेल्या टोलेजंग इमारती आणि कॉर्पोरेट कार्यालये एकीकडे असतानाच दुसरीकडे मच्छिमार नगरसह काही वस्त्यादेखील येथे आहेत. हा मतदारसंघ तसा कायम भाजपकडेच राहिला आहे. पण यंदा दोन्ही प्रमुख राष्ट्रीय पक्षांनी नवीन उमेदवार दिला आहे. त्यामुळे लढत काहीशी रंगतदार आहे.
मच्छिमारांच्या घरांचे सीमांकन रखडले
कफ परेड येथील मच्छिमारनगर ही जुनी वसाहत आहे. पण अद्यापही येथील घरांचे सीमांकन झालेले नाही. ज्या जमिनीवर ही घरे उभी आहेत, त्या जागेची मालकी येथील मच्छिमार बांधवांकडे नाही. अधिकृतरित्या 'कोळीवाडा' म्हणून सरकार दरबारी नोंद नसलेली ही मुंबईतील एकमेव मच्छिमार वसाहत आहे. हीच येथील रहिवाशांची प्रमुख समस्या आहे. जागा अधिकृत मालकीची करण्यासंबंधी सरकारदरबारी अनेक आश्वासने मिळूनदेखील ती पाळली न गेल्याची नाराजी येथील नागरिकांमध्ये असून त्यामुळे जवळपास १० ते १२ हजार मच्छिमार मतदार महत्त्वाची भूमिका बजावतील, असेही येथील मच्छिमार सर्वोदय सहकारी सोसायटीच्या पदाधिकाऱ्यांनी म्हटले आहे.
पार्किंगची समस्या
कुलाबा मतदारसंघातील मुख्य रस्त्यांना लागून असलेल्या गल्ल्या अरुंद आहेत. पण मतदारसंघात अनेक कार्यालयेही आहेत. या कार्यालयांना भेटी देण्यासाठी येणारे याच अरुंद गल्ल्यांमध्ये वाहने उभी करतात. त्यामुळे येथील मूळ रहिवाशांना दिवसा स्वत:चे वाहन बाहेर काढण्यात अडचणी येतात. पार्किंगची समस्या मोठी आहे.
रहदारी अधिक
कुलाबा हा मूळ मुंबईचा सर्वात जुन्या भागांपैकी एक आहे. यामुळे येथील रस्तेची जुने आहेत. त्या तुलनेत आज रहदारी खूप वाढली आहे. मुख्य रस्ते आठवडाभर गर्दीने फुललेले असतात. पण रस्ते अरुंद असल्याने अनेक भागांत वाहतुकीची कोंडी होते. अरुंद रस्ते व त्या तुलनेत रहदारी अधिक, ही येथील समस्या आहे.
२०१४ ची विधानसभा निवडणूक
उमेदवार पक्ष मिळालेली मते
राज के. पुरोहित भाजप ५२,६०८
पांडुरंग सकपाळ शिवसेना २८,८२१
अॅनी शेखर काँग्रेस २०,४१०
२०१९ चे उमेदवार
अशोक (भाई) जगताप : काँग्रेस
राहुल नार्वेकर : भाजप
जितेंद्र कांबळे : वंचित बहुजन आघाडी
अर्जुन रुखे : बहुजन समाज पार्टी