करोना रुग्णसंख्येत जानेवारीअखेरीस उच्चांक, नंतर घटेल :आरोग्यमंत्री राजेश टोपे

म. टा. प्रतिनिधी, मुंबई

महाराष्ट्रात करोना रुग्णसंख्येचा दर मोठा असून करोनाची तिसरी लाट आल्याचे आरोग्यमंत्री राजेश टोपे यांनी सोमवारी सांगितले. सध्या वाढणारी करोना रुग्णसंख्या ही आणखी वाढेल आणि ती जानेवारीच्या अखेरीस उच्चांक गाठेल. त्यानंतर रुग्णसंख्येचा आलेख कमी होण्याची शक्यता आहे, असे टोपे यांनी नमूद केले.

केंद्रीय आरोग्यमंत्र्यांशी झालेल्या बैठकीनंतर आरोग्यमंत्री टोपे यांनी ही माहिती दिली. ते म्हणाले की, सध्या राज्याच्या आरोग्य व्यवस्थेवर कोणताही ताण नाही. कारण ८५ टक्के रुग्णांना कोणतीही लक्षणे नाहीत. आता जिल्हास्तरावर गृह विलगीकरणातील व्यक्तींसाठी किट तयार करण्यात येणार आहे. चाचण्यांची संख्या वाढवणार आहे. राज्यात ज्याठिकाणी लसीकरण जास्त झाले, त्याठिकाणी मृत्युसंख्या कमी आहे. त्यामुळे लसीकरणाची गती आणखी वाढवण्यावर भर दिला जाईल. राज्यात जवळपास ९० टक्के लोकांनी करोनाची पहिली लसमात्रा घेतली असून ६९ टक्के लोकांनी दोन्ही लसमात्रा घेतल्या आहेत. राज्यात सध्या पावणेदोन लाख उपचाराधीन रुग्ण आहेत. एकूण रुग्णसंख्येत ८५ टक्के लोक लक्षणे नसलेले असून, १३ टक्के लोकांना सौम्य लक्षणे असल्याचे समोर आले असल्याची माहिती टोपे यांनी दिली.

राज्यात ऑक्सिजन निर्मितीचे ४०४ प्लांट सुरू असून, येत्या दहा दिवसांत आणखी १०० प्लांट सुरू होतील. तसेच केंद्राने जिल्हाधिकाऱ्यांच्या पातळीवर खर्चासाठी परवानगी द्यावी, अशी मागणी करण्यात आली असल्याचे टोपे यांनी सांगितले.

देशभरात विलगीकरणाचा कालावधी हा सातच दिवस राहील. त्यात कोणताही बदल होणार नाही, असे केंद्र सरकारने स्पष्ट केले असल्याचे टोपे यांनी सांगितले. सात दिवसांच्या गृह विलगीकरणात सरकारकडून पहिल्या, पाचव्या आणि सातव्या या दिवशी कॉल केले जाऊन त्या रुग्णांची नोंद ठेवली जाईल. रुग्णांची विचारपूस कॉलद्वारे करण्यात येणार आहे. रुग्णाला अडचण आल्यास त्याला लगेच रुग्णालयात दाखल करण्याची प्रकिया सुरू करणार आहे, असे टोपे म्हणाले.

गृह विलगीकरणात असलेल्यांना हेल्थ किट

गृह विलगीकरणात असणाऱ्या रुग्णांसाठी होम आयसोलेशन हेल्थ किट दिले जाईल. त्यात सॅनिटायझर, १० मास्क, माहिती पुस्तिका, १० पॅरासीटामॉल गोळी, २० मल्टी व्हिटॅमिनच्या गोळ्या असतील. तशा सूचना आरोग्य विभागाला देण्यात आल्या आहेत, असे टोपे यांनी स्पष्ट केले. डॅशबोर्ड तयार करून रुग्णांना सर्व माहिती व्यवस्थित मिळावी याची खबरदारी घेतली जाईल, असेही ते म्हणाले.