एसटीत दंडाच्या रकमेवर जीएसटी !

म. टा. प्रतिनिधी, मुंबई

एसटीतून विनातिकिट प्रवास करणाऱ्या प्रवाशांना आता दुहेरी फटका बसणार आहे. विनातिकीट प्रवास करताना पकडले गेल्यास दंडाच्या रकमेसह त्यावर वस्तू व सेवा करही (जीएसटी) भरावा लागणार आहे. एसटी महामंडळाने राज्यातील सर्व तिकीट तपासनीसांना तसे निर्देश दिले आहेत. या निर्णयामुळे किमान १०० रुपयांच्या दंडावर वीस रुपयांचा कर आकारला जाणार आहे.

एसटी महामंडळातील अनेक बसगाड्यांना दोन्ही बाजूंनी दरवाजे आहेत. गर्दीमुळे प्रत्येक प्रवाशांपर्यंत पोहोचण्यात तिकीट तपासनीसांना अडचणी येतात. अनेकवेळा गर्दीचा फायदा घेऊन प्रवासी दरवाज्यातील पायऱ्यांवर उभे राहून प्रवास करतात. याचा फायदा घेऊन अनेक प्रवासी विनातिकीट प्रवास करतात. अशा प्रवाशांकडून मिळणारा दंड हे महामंडळाचे उत्पन्न म्हणून ग्राह्य धरण्यात आले आहे. यामुळे या उत्पन्नावर १८ टक्के वस्तू व सेवा कर लावण्याचा निर्णय एसटी महामंडळाने घेतला. मुंबईसह राज्यातील ३१ विभागांना महामंडळातर्फे तसे निर्देश देण्यात आले आहेत.

विनातिकिट प्रवास करणाऱ्या प्रवाशांकडून १०० रुपये किंवा चुकविलेल्या प्रवासी भाड्याचे दुप्पट यापैकी जी रक्कम अधिक असेल ती रक्कम वसूल करण्याचा नियम एसटी महामंडळात आहे.

असा आकारणार दंड

तपशील दंडाची रक्कम वस्तू व सेवा कर (टक्के) प्रवाशांकडून आकारावयाची रक्कम पाचच्या पटीत (रुपये)

-किमान दंड १०० १८.०० ११८ १२०

-दुप्पट दंड ३७० ६७ ४३७ ४३५

(१००पेक्षा जास्त उदा. १८५ रुपये प्रतितिकीट)