निरोगी आयुष्यासाठी मार्गदर्शन

मुंबई ः आजच्या काळात दैनंदिन जीवनातही विज्ञानाला महत्त्वाचे स्थान आहे. निरोगी आयुष्याच्या दृष्टीने स्वयंपाकघरातील विज्ञानाबरोबरच अन्नप्रक्रिया, व्यायाम, सकारात्मक दृष्टिकोन या गोष्टींचेही ज्ञान आवश्यक आहे. या आणि आहारासंदर्भातील इतर अनेक बाबींविषयी येत्या पार्ले कट्ट्यामध्ये मार्गदर्शन करण्यात येणार आहे.

शनिवार १ एप्रिल रोजी साठे उद्यान, पार्क रोड-मालवीय रोड चौक, विलेपार्ले पूर्व येथे सायं. ५.३० वा. वैज्ञानिक आणि संशोधक डॉ. स्मिता लेले मार्गदर्शन करणार आहेत. डॉ. लेले रसायनशास्त्रज्ञ, बायोटेक इंजिनिअरिंग व अन्नप्रक्रिया या विषयातील तज्ज्ञ आहेत. त्या इन्स्टिट्यूट ऑफ केमिकल टेक्नॉलॉजी या संस्थेच्या कुलसचिव आहेत. त्या समाजामध्ये विज्ञानाचा प्रचार व्हावा यासाठी प्रयत्नशील आहेत. त्यांच्याशी डॉ. अनुया पालकर संवाद साधतील. पार्ले कट्ट्याच्या मुक्त व्यासपीठात यावेळी उतारवयातील जोडीदाराची गरज या विषयावर कल्पना पैठणकर आपले विचार मांडणार आहेत. पार्ले कट्टा हा उपक्रम सर्वांसाठी निःशुल्क आहे.