शिंदे गटातील ४ मंत्री भाजपमध्ये?; गुगल सर्चचा रिझल्ट पाहून अनेकजण उडालेच

मुंबई: शिवसेना आमचीच, आम्ही बाळासाहेबांचेच शिवसैनिक असं ठासून सांगणाऱ्या शिंदे गटातील ४ मंत्र्यांचा पक्ष भाजप असल्याचं गुगल सर्च केल्यावर दिसत आहे. गुगल सर्च केल्यावर दिसत असलेला रिझल्ट पाहून अनेकजण चकीत झाले. ज्या मंत्र्यांचा पक्ष विकिपीडियावर भाजप दाखवण्यात आला आहे, त्यामध्ये गुलाबराव पाटील, संदिपान भुमरे, दादा भुसे आणि उदय सामंत यांचा समावेश आहे.

राज्यात कालच मंत्रिमंडळ विस्तार पार पडला. शिंदे गटाकडून एकूण ९ जणांनी मंत्रिपदाची शपथ घेतली. त्यामध्ये गुलाबराव पाटील, संदिपान भुमरे, दादा भुसे, उदय सामंत, तानाजी सावंत, संजय राठोड, दीपक केसरकर, अब्दुल सत्तार, शंभुराज देसाई यांचा समावेश आहे. यापैकी चार मंत्र्यांचा पक्ष भाजप असल्याचं विकीपीडियावर दिसत आहे. तर इतरांचा पक्ष शिवसेनाच आहे.

हेही वाचा- काय सांगता? देवेंद्र फडणवीस उत्तर प्रदेशचे उपमुख्यमंत्री; नेमकं काय घडलंय?

नेमकं काय दिसतंय गुगलवर?
गुलाबराव पाटील यांच्या प्रोफाईलमध्ये ते शिवसेना प्रवक्ते असल्याचं दिसत आहे. खाली राजकीय पक्ष भारतीय जनता पार्टी असल्याचं दिसून येत आहे. त्यामुळे नेमकं गुगलला झालंय काय? असा सवाल उपस्थितीत झाला आहे. विकिपीडिया शक्यतो कुणीही अपडेट करू शकतो. पण, एवढ्या मोठ्या सर्च इंजिनवर एका मोठ्या राजकीय व्यक्तीचा पक्ष कसा चुकू शकतो, असा प्रश्न उपस्थित केला जात आहे. याआधीही गुगलकडून अशा बऱ्याच चुका झालेल्या आहे. देवेंद्र फडणवीस उत्तर प्रदेशचे उपमुख्यमंत्री असल्याचं रविवारी गुगल सर्चमध्ये दिसत होतं.