हार्बर विस्कळीत, प्रवाशांना मनस्ताप

मुंबई: चेंबूर येथे रेल्वेरुळाखालील सिमेंटचे बॉक्स बदलण्याचे काम सुरू करण्यात आल्याने हार्बर मार्गावरील वाहतूक विस्कळीत झाली आहे. या तांत्रिक कारणामुळे हार्बरवरील रेल्वेवाहतूक १० ते १५ मिनिटे उशिराने धावत आहे. मात्र ऐन गर्दीच्यावेळीच हार्बरचा खोळंबा झाल्याने प्रवाशांना प्रचंड मनस्ताप सहन करावा लागत आहे.

आज सकाळी ७ वाजल्यापासून हार्बर मार्गावर चेंबूर येथे रुळाखालील सिमेंटचे बॉक्स बदलण्याचे काम सुरू करण्यात आले आहेत. रुळाखालील हे सिमेंटचे बॉक्स खूप जुने असल्याने ते बदलण्यात येत आहेत. परिणामी छत्रपती शिवाजी महाराज टर्मिनसच्या दिशेने जाणारी वाहतूक १० ते १५ मिनिटे उशिराने धावत आहे. हार्बरची वाहतूक उशिराने धावत असल्याची उद्घोषणाही करण्यात येत आहे. मात्र रेल्वेने या कामाची कोणतीही पूर्वसूचना न दिल्याने कामावर जाण्यासाठी रेल्वे स्थानकावर आलेल्या प्रवाशांचे प्रचंड हाल होत आहेत. दरम्यान, सकाळी सकाळीच लोकलचं रडगाणं सुरू झाल्याने चाकरमान्यांना मनस्ताप सहन करावा लागत आहे. हार्बर मार्गावरील अनेक स्थानकांवर प्रवाशांची प्रचंड गर्दी झाली आहे. प्रवाशांच्या सोयीसाठी बेस्टच्या जादा बसेसची सुविधा नसल्याने प्रवासी संताप व्यक्त करत आहेत. लोकल उशिराने धावत असल्याने अनेक प्रवाशांना गर्दीतूनच प्रवास करावा लागत असून ऑफिसला जाण्यास उशीर होणार असल्याने आज अनेक चाकरमान्यांचा लेटमार्क लागणार आहे.