बिघाडामुळे हार्बर रेल्वे विस्कळीत

मुंबई : हार्बर मार्गावर रविवारच्या मेगाब्लॉकनंतर लगेचच दुसऱ्या दिवशी म्हणजे सोमवारी कुर्ला येथे दुपारी मालगाडीच्या इंजिनात बिघाड झाल्याने वाहतूक विस्कळीत झाली. साधारण २० मिनिटांनी हा बिघाड दुरुस्त झाल्यानंतर वाहतूक हळूहळू पूर्वपदावर आली.

कुर्ला स्थानकाजवळ दुपारी १२.०६च्या सुमारास मालगाडीच्या इंजिनच्या कपलिंगमध्ये बिघाड झाल्याने गाडी जागीच खोळंबली. ही गाडी एकमेकांना जोडणाऱ्या रुळांवरून जात असतानाच नेमका हा बिघाड झाला. त्यामुळे दोन्ही मार्गांवरील वाहतूक विस्कळीत झाली.

दुपारी झालेला हा बिघाड दुरुस्त करण्याचे काम तत्काळ सुरू करण्यात आले. ते पूर्ण होण्यासाठी २० मिनिटे लागली. यादरम्यान एक फेरी रद्द करण्यात आली, तर अपवरील दोन आणि डाऊन मार्गावरील तीन लोकल फेऱ्या उशीराने धावत होत्या.