​ एकतर्फी प्रेमातून ‘ऑनलाइन’ छळ

suraj.sawant@timesgroup.com
Tweet : @SSawantMT

मुंबई ः एकतर्फी प्रेमात होकार मिळाला नाही तर मुलीला शक्य त्या सर्व मार्गाने छळायचे, या विकृतीत दिवसेंदिवस वाढ होताना दिसत आहे. जोगेश्वरीच्या मेघवाडी परिसरात राहणाऱ्या एका १९ वर्षीय युवकाच्या कारनाम्यामुळे त्याच्या वर्गातील तरुणी आणि तिच्या कुटुंबीयांना नाहक मनस्ताप सहन करावा लागला. या त्रासाला कंटाळून मुलीने मेघवाडी पोलिसात तक्रार नोंदवली आहे. पोलिस या तरुणाच्या विरोधात ठोस पुरावे गोळा करत असून त्याचा शोध घेत आहेत.

मेघवाडी नाका परिसरात राहणारा आरोपी सिद्धेश मिठबावकर (१९) हा कम्प्युटर इंजिनीअरिंगच्या पहिल्या वर्षाला असून त्याचे त्याच परिसरात राहणाऱ्या त्याच्याच वर्गातील मुलीवर प्रेम होते. या युवतीने कुणाशी संभाषण करावे, कुणाला फोन करावेत, मोबाइलवर उशिरापर्यंत चॅटिंग करावे का, अशा अनेक गोष्टींवरून दोघांमध्ये अनेकदा वाद झाले. कालांतराने ही मुलगी कराड येथे मेडिकलचे शिक्षण घेण्यासाठी गेली. तर सिद्धेशने जोगेश्वरीच्या एका नामांकित कॉलेजात कम्प्युटर इंजिनीअरिंगला प्रवेश घेतला. तरुणी लांब असली तरी सिद्धेश वारंवार तिचे फेसबुकवरील फोटो पाहून वेगळ्याच नंबरवरून संपर्क साधत नाव बदलून तिला टोकायचा. मात्र ती जुमानेशी झाल्यावर सिद्धेशने तिचे ‘हिट वे’ या अश्लील संकेतस्थळावर प्रोफाइल बनवून त्याद्वारे इतर तरुणांशी अश्लील संवाद करू लागला. तिचा फोटो, फोन नंबर आणि घरचा पत्ताही त्याने या संकेतस्थळावर दिला होता. त्यातून युवतीच्या घरी अनोळखी तरुणांचे येणे-जाणे सुरू झाले. तरुणीच्या नावाने भेटवस्तूही घरी येऊ लागल्याने मुलीच्या कुटुंबावर दडपण आले.

कहर म्हणजे सिद्धेशने एका तरुणाला एके मध्यरात्री तिच्या घरी आमंत्रित केले. त्यावेळी मुलीच्या कुटुंबीयांनी त्या तरुणाची कानउघडणी केल्यानंतर अश्लील संकेतस्थळावरील प्रकरणाचे बिंग फुटले. या सर्व कृत्यामागे सिद्धेशच असल्याची खात्री पटल्यानंतर मुलीने सिद्धेशविरोधात मेघवाडी पोलिसांत तक्रार नोंदवली. पोलिसांनी सिद्धेशविरोधात गुन्हा नोंदवून ‘हिट वे’ आणि सायबर पोलिसांकडून माहिती मागवली आहे. या आधारावर पोलिस लवकरच सिद्धेशला अटक करणार असल्याची माहिती सूत्रांनी दिली.