अमृता फडणवीसांच्या 'या' ट्वीटचा रोख कोणाकडे?

मुंबई: अभिनेत्री कंगना राणावत हिच्यावरील टीकेबद्दल शिवसेनेचे खासदार संजय राऊत यांनी खुलासा केल्यानंतर ते टीकेच्या रडारवर आले आहेत. खुलासा करताना त्यांनी वापरलेल्या 'नॉटी' शब्दावरून भाजप नेत्यांनी त्यांना टीकेचे लक्ष्य केलं आहे. विरोधी पक्षनेते देवेंद्र फडणवीस यांच्या पत्नी अमृता फडणवीस यांनीही याच शब्दाचा उल्लेख करत एक ट्वीट केलं आहे. त्यांचा रोख संजय राऊत यांच्याकडंच असल्याचं बोललं जात आहे.

वाचा: कंगनाला Y दर्जाची सुरक्षा; रोहित पवारांना 'ही' शंका

मुंबई व मुंबई पोलिसांबद्दल आक्षेपार्ह वक्तव्य केल्यामुळं कंगना राणावत ही वादाच्या भोवऱ्यात अडकली होती. कंगनाच्या या वक्तव्याविरोधात शिवसैनिक रस्त्यावर उतरले होते. शिवसेनेचे खासदार संजय राऊत यांनी कंगनाला आपल्या राज्यात निघून जाण्याचा सल्ला दिला होता. मात्र, कंगनानं त्यांना आव्हान देत मुंबईत येणारच, अडवून दाखवा, असं म्हटलं होतं. त्यामुळं संतापलेल्या राऊत यांनी तिच्यावर शेलक्या शब्दांत टीका केली होती. राऊत हे कंगनाला 'हरामखोर' म्हणाले होते. त्यावरून प्रचंड गदारोळ झाला. राऊत यांनी कंगनाची व महाराष्ट्राची माफी मागावी, अशी मागणी करण्यात आली. त्यामुळं राऊत यांनी 'हरामखोर' शब्दाबाबत खुलासा केला. मला कंगनाला 'नॉटी' व 'बेईमान' म्हणायचं होतं, असं त्यांनी सांगितलं. राऊत यांनी केलेल्या या खुलाशावरून त्यांची खिल्ली उडवली जात आहे.

वाचा: मुख्यमंत्र्यांचा एकेरी उल्लेख; टीव्ही पत्रकाराविरोधात हक्कभंग

भाजपचे आमदार अतुल भातखळकर यांनी त्यांना 'नॉटी बॉय' म्हटलं होतं. अमृता फडणवीस यांनीही एक ट्वीट केलं आहे. 'आम्हाला वाटलं नव्हतं त्यापेक्षा जास्त ते नॉटी निघाले,' असं अमृता फडणवीस यांनी आपल्या ट्वीटमध्ये म्हटलं आहे. #naughty असंही त्यांनी लिहिलं आहे. अमृता यांनी थेट कोणाचंही नाव घेतलं नसलं तरी त्यांचा हा टोला राऊत यांच्यासाठीच असल्याचं बोललं जात आहे. अमृता फडणवीस यांनी याआधीही अभिव्यक्ती स्वातंत्र्याचा हवाला देत कंगना राणावतचं समर्थन केलं होतं.