म. टा. विशेष प्रतिनिधी, मुंबई
गडगडाट व वादळी वाऱ्यासह आलेल्या पावसाने मंगळवारी मुंबईकरांच्या मनात २९ ऑगस्टच्या प्रलयंकारी पावसाच्या आठवणी जाग्या झाल्या. संध्याकाळी ऑफिस सुटण्याच्या वेळेसच मुसळधार पाऊस सुरू झाल्याने घरी जाण्यासाठी नोकरदार मंडळींची धावपळ उडाली. पाऊस सुरू झाल्यावर मुंबईच्या तापमानात एकदम घट झाली. सरासरी ३२ अंश सेल्सिअसवर गेलेले तापमान सरासरी २६ अंश सेल्सिअसपर्यंत खाली आले. पावसामुळे परळ हिंदमाता भागात लगेच पाणी तुंबले. त्यामुळे डॉ. बाबासाहेब आंबेडकर मार्गावर वाहनांच्या रांगा लागल्या. सांताक्रूझ-चेंबूर लिंक रोडवरही अनेक ठिकाणी पाणी तुंबले होते.
इशारा खरा ठरला
मुंबईत अतिवृष्टीचा इशारा प्रादेशिक हवामान विभागाने दोन दिवसांपूर्वीच दिला होता. आता पुढील २४ ते ४८ तासात मुंबईत अतिवृष्टीचा इशारा प्रादेशिक हवामान विभागाने दिला आहे
तीन तासांतील पाऊस
(मिमीमध्ये)
शहर ८५.७४
पूर्व उपनगर ६२.४५
पश्चिम उपनगर ९२.२१