म. टा. विशेष प्रतिनिधी, मुंबई
महापौर निधीत जास्तीत जास्त वाढ करण्यासाठी व या निधीचा वापर गरीब, गरजू रुग्णांसाठी करण्याकरिता सर्वपक्षीय लोकप्रतिनिधींनी त्यांचे एक महिन्याचे मानधन व पालिका कर्मचाऱ्यांनी त्यांचे एक दिवसाचे वेतन भेट म्हणून महापौर निधीमध्ये जमा करावे, असा मनोदय महापौर विश्वनाथ महाडेश्वर यांनी व्यक्त केला आहे.
महापौरांनी पालिका चिटणीस प्रकाश जेकटे यांना याविषयी पत्र पाठवले आहे. या विषयावर पालिकेच्या सर्वपक्षीय गटनेता बैठकीत चर्चा होणार असून सकारात्मक निर्णय होण्याची शक्यता आहे. महापौर निधीतून कॅन्सर, किडनी, हृदयरोग यांसारख्या दुर्धर आजारांवर उपचार करण्यासाठी गरीब, सामान्य रुग्णांना आर्थिक मदत दिली जाते. मात्र ही आर्थिक मदत देण्यासाठी महापौर निधी अपुरा पडत असल्याने महापौर चिंतेत आहेत.
महापौर निधीतून लाभ मिळविण्यासाठी येणाऱ्या अर्जांची संख्या दिवसेंदिवस वाढती असून निधी अपुरा पडत आहे. यावर मार्ग काढण्याचा प्रयत्न महापौरांनी केला आहे. मुंबईत वाढत्या शहरीकरणाबरोबरच लोकसंख्येतही दररोज वाढ होत आहे. वाढत्या प्रदूषणामुळे रोगराई वाढत आहे. महागड्या रुग्णालयात विविध दुर्धर आजारांवर महागडे उपचार घेणे गरीब, सामान्य नागरिकांना परवडत नाही. त्यांच्याकडे आर्थिक चणचण असते. यामुळे महापौर निधीत वाढ करण्याची गरज असल्याचे महापौरांनी सांगितले.