म. टा. खास प्रतिनिधी, मुंबई
भारतीय पोलिस खात्यातील अरनॉल्ड श्वार्झनेगर म्हणून ओळखले जाणारे राज्याचे अतिरिक्त पोलिस महासंचालक (आस्थापना) हिमांशू रॉय (५४) यांनी शुक्रवारी दुपारी १ ते दीडच्या दरम्यान चर्चगेट येथील राहत्या घरी आत्महत्या केली. कॅन्सरशी लढताना आलेल्या नैराश्यातून खासगी रिव्हॉल्वरमधून तोंडात गोळी झाडून मृत्यूकडे जाण्याचा धक्कादायक मार्ग त्यांनी पत्करला. उपचारांसाठी वैद्यकीय रजेवर असलेल्या रॉय यांनी दोन वर्षांपासून औषधोपचार सुरू असताना आलेल्या नैराश्यातून हा निर्णय घेतल्याचे आत्महत्येपूर्वी लिहिलेल्या चिठ्ठीत नमूद केले आहे.
गेल्या दोन वर्षांपासून कॅन्सरशी लढा देणाऱ्या रॉय यांनी शुक्रवारी चर्चगेट येथील सुरुची सुनिती इमारतीतील राहत्या घरातील बेडरूममध्ये दुपारी १ ते दीडच्या दरम्यान स्वत:च्या खासगी रिव्हॉल्वरने तोंडात गोळी झाडून आत्महत्या केली. या वेळी घरात पत्नी भावना व दोन नोकर उपस्थित होते. गोळी झाडल्याचा आवाज ऐकताच भावना यांनी तिथे धाव घेतली. त्यानंतर रक्ताच्या थारोळ्यातील रॉय यांना तात्काळ बॉम्बे रुग्णालयात दाखल करण्यात आले. पण त्यापूर्वीच त्यांचा मृत्यू ओढवल्याचे डॉक्टरांनी जाहीर केले. त्यांच्या या धक्कादायक निधनाने पोलिस दलात हळहळ व्यक्त होत आहे.
भारतीय पोलिस सेवेच्या (आयपीएस) १९८८ च्या तुकडीचे अधिकारी असलेल्या रॉय यांचा कार्यकाळ नेहमीच गाजला. मुंबईकर असलेल्या रॉय यांचे बालपण कुलाब्यात व्यतीत झाले. सेंट झेवियर्स कॉलेजमध्ये शिक्षण घेतलेल्या रॉय यांना आयपीएस झाल्यानंतर महाराष्ट्र केडर मिळाली. कर्तबगार अधिकारी म्हणून रॉय यांची कारकीर्द नेहमीच चर्चेत राहिली.
२०००मध्ये कॅन्सरवर मात पण...
हिमांशू रॉय यांना २००० साली किडनीचा कॅन्सर झाला होता. त्यावेळी एशिअन कॅन्सर इन्स्टिट्यूटचे कॅन्सरतज्ज्ञ डॉ. जगदीश कुलकर्णी यांनी २००० साली त्यांच्यावर शस्त्रक्रिया केली होती. नाशिकमधील एचसीजी मानवता केअर सेंटरमधील सेंटर फॉर डिफिकल्ट कॅन्सर या केंद्रामध्ये हिमांशू रॉय यांच्या तपासण्या केल्या जात होत्या. या तपासण्याच्या आधारे त्यांच्यावर मुंबई आणि पुण्यात पुढील उपचार सुरू होते. २०१६पर्यंत त्यांची प्रकृती बरी होती. मागील दोन वर्षांपासून हा कॅन्सर हाडापर्यंत पसरल्याने त्यांची प्रकृती चिंताजनक झाल्याचे डॉ. राज नगरकर यांनी सांगितले.
महत्त्वाची कामगिरी
मुंबई क्राइम ब्रँचचे सहपोलिस आयुक्तपद भूषविताना रॉय यांची २६/११ च्या दहशतवादी हल्ल्यातील दोषी अजमल कसाबला फाशी देण्याच्या प्रक्रियेत महत्त्वाची भूमिका होती. त्यासह आयपीएल क्रिकेट बेटिंग, पत्रकार जे. डे यांची हत्या, अस्थर अनुह्या, मीनाक्षी थापा, पल्लवी पुरकायस्थ तसेच शक्ती मिलमधील तरुणीवरील बलात्कार आदी प्रकरणांतील त्यांचा तपासही गाजला. २९ मार्च २०१० ते १७ फेब्रुवारी २०१४ या कालावधीत ते क्राइम ब्रँचचे सहपोलिस आयुक्त होते. या पदावर सर्वाधिक कालावधी भूषवण्याचा मानही त्यांच्याकडे जातो.
पोलिस दलाचे नुकसान
हिमांशू रॉय यांचे निधन हे पोलिस दलाचे फार मोठे नुकसान आहे. मुंबई क्राइम ब्रँच, एटीएसमध्ये त्यांनी केलेली कामगिरी कौतुकास्पद होती. एका चांगला अधिकारी आम्ही आज गमावला. ईश्वर त्यांच्या कुटुंबीयांना या धक्क्यातून सावरण्याची शक्ती देवो हीच प्रार्थना. - दत्ता पडसलगीकर, मुंबई पोलिस आयुक्त
पोलिस दलाचे बलस्थान
हिमांशू रॉय कर्तव्यनिष्ठ पोलीस अधिकारी होते. पोलिस दलाचे ते बलस्थान होते. गुन्हे तपासात त्यांचा हातखंडा होता. आपल्या सेवाकाळात धारण केलेल्या प्रत्येक पदावर त्यांनी वैशिष्ट्यपूर्ण कामगिरी केली. त्यांच्या आकस्मिक निधनाने राज्याच्या पोलिस दलाचे मोठे नुकसान झाले आहे. - राज्यपाल सी. विद्यासागर राव
कर्तव्यदक्ष अधिकारी गमावला
हिमांशू रॉय यांनी अनेक महत्त्वाच्या प्रकरणाचा यशस्वीपणे तपास केला आहे. त्यांच्या अकस्मात निधनाने कर्तव्यदक्ष अधिकारी गमावला असून त्यांच्या कुटुंबीयांच्या दु:खात सहभागी आहे. - देवेंद्र फडवणीस, मुख्यमंत्री
धाडसी अधिकारी गेला
रॉय हे धाडसी अधिकारी होते, त्यातील राज्यातील कायदा आणि सुव्यवस्था कायम राखण्यासाठी दिलेल्या सहयोगाबद्दल राज्य नेहमी त्यांना लक्षात ठेवेल. - अशोक चव्हाण, काँग्रेस प्रदेशाध्यक्ष
कालच जिममध्ये भेटलो...
मी त्यांना गुरुवारी जिममध्ये भेटलो. आम्ही साधारण २० मिनिटे संवाद साधला. तुमची त्वचा अधिक काळपट झाली असे त्यांना म्हणताच त्यांनी केमोथेरपीचा हा परिणाम असून ही प्रक्रिया सोपी नाही, असे सांगितले. रॉय हे अतिशय चांगले अधिकारी होते. कॅन्सर झाल्याचे कळताच त्यांनी नोकरी सोडण्याच्या बेतात असल्याचे सांगितले असता त्याऐवजी तुम्ही दीर्घ सुट्टीवर जा, असा सल्ला मी दिला होता. - जयंत पाटील, प्रदेशाध्यक्ष, राष्ट्रवादी काँग्रेस
माझे वैयक्तिक नुकसान
रॉय यांच्या निधनाच्या वृत्ताने धक्का बसला. ते माझे जवळचे मित्रही होते. त्यांच्या निधनाने माझे वैयक्तिक नुकसान झाले आहे. - राधाकृष्ण विखे-पाटील, विरोधीपक्ष नेते
उमदे व्यक्तिमत्त्व हरपले
हिमांशू रॉय हा जिंदादिल माणूस होता. मोठ्या पदावर असून त्यांच्या वागण्याबोलण्यात कोणताही बडेजाव नव्हता. शिपायापासून वरिष्ठ अधिकाऱ्यांना ते अदबीने वागवायचे. कोणालाही ताटकळत ठेवत नसत. त्यांनी कधीही कोणाला दुखावलं नाही. त्यांना व्यायामाची आवड होती. आजारामुळे नैराश्य आल्याने त्यांनी आयुष्य संपवले असावे. - अॅड. उज्ज्वल निकम
सहकाऱ्यांची श्रद्धांजली
१९८८ च्या आयपीएस तुकडीतील अधिकाऱ्यांनी ट्विटर अकांऊंटवरून आपल्या सहकाऱ्यास श्रद्धांजली अर्पण केली आहे. एक धाडसी अधिकारी गमावला असून त्याचे नुकसान कधीही भरून निघणारे नाही, असे त्यात म्हटले आहे.
भारतीय पोलिस खात्यातील अरनॉल्ड श्वार्झनेगर म्हणून ओळखले जाणारे राज्याचे अतिरिक्त पोलिस महासंचालक (आस्थापना) हिमांशू रॉय (५४) यांनी शुक्रवारी दुपारी १ ते दीडच्या दरम्यान चर्चगेट येथील राहत्या घरी आत्महत्या केली. कॅन्सरशी लढताना आलेल्या नैराश्यातून खासगी रिव्हॉल्वरमधून तोंडात गोळी झाडून मृत्यूकडे जाण्याचा धक्कादायक मार्ग त्यांनी पत्करला. उपचारांसाठी वैद्यकीय रजेवर असलेल्या रॉय यांनी दोन वर्षांपासून औषधोपचार सुरू असताना आलेल्या नैराश्यातून हा निर्णय घेतल्याचे आत्महत्येपूर्वी लिहिलेल्या चिठ्ठीत नमूद केले आहे.
गेल्या दोन वर्षांपासून कॅन्सरशी लढा देणाऱ्या रॉय यांनी शुक्रवारी चर्चगेट येथील सुरुची सुनिती इमारतीतील राहत्या घरातील बेडरूममध्ये दुपारी १ ते दीडच्या दरम्यान स्वत:च्या खासगी रिव्हॉल्वरने तोंडात गोळी झाडून आत्महत्या केली. या वेळी घरात पत्नी भावना व दोन नोकर उपस्थित होते. गोळी झाडल्याचा आवाज ऐकताच भावना यांनी तिथे धाव घेतली. त्यानंतर रक्ताच्या थारोळ्यातील रॉय यांना तात्काळ बॉम्बे रुग्णालयात दाखल करण्यात आले. पण त्यापूर्वीच त्यांचा मृत्यू ओढवल्याचे डॉक्टरांनी जाहीर केले. त्यांच्या या धक्कादायक निधनाने पोलिस दलात हळहळ व्यक्त होत आहे.
भारतीय पोलिस सेवेच्या (आयपीएस) १९८८ च्या तुकडीचे अधिकारी असलेल्या रॉय यांचा कार्यकाळ नेहमीच गाजला. मुंबईकर असलेल्या रॉय यांचे बालपण कुलाब्यात व्यतीत झाले. सेंट झेवियर्स कॉलेजमध्ये शिक्षण घेतलेल्या रॉय यांना आयपीएस झाल्यानंतर महाराष्ट्र केडर मिळाली. कर्तबगार अधिकारी म्हणून रॉय यांची कारकीर्द नेहमीच चर्चेत राहिली.
२०००मध्ये कॅन्सरवर मात पण...
हिमांशू रॉय यांना २००० साली किडनीचा कॅन्सर झाला होता. त्यावेळी एशिअन कॅन्सर इन्स्टिट्यूटचे कॅन्सरतज्ज्ञ डॉ. जगदीश कुलकर्णी यांनी २००० साली त्यांच्यावर शस्त्रक्रिया केली होती. नाशिकमधील एचसीजी मानवता केअर सेंटरमधील सेंटर फॉर डिफिकल्ट कॅन्सर या केंद्रामध्ये हिमांशू रॉय यांच्या तपासण्या केल्या जात होत्या. या तपासण्याच्या आधारे त्यांच्यावर मुंबई आणि पुण्यात पुढील उपचार सुरू होते. २०१६पर्यंत त्यांची प्रकृती बरी होती. मागील दोन वर्षांपासून हा कॅन्सर हाडापर्यंत पसरल्याने त्यांची प्रकृती चिंताजनक झाल्याचे डॉ. राज नगरकर यांनी सांगितले.
महत्त्वाची कामगिरी
मुंबई क्राइम ब्रँचचे सहपोलिस आयुक्तपद भूषविताना रॉय यांची २६/११ च्या दहशतवादी हल्ल्यातील दोषी अजमल कसाबला फाशी देण्याच्या प्रक्रियेत महत्त्वाची भूमिका होती. त्यासह आयपीएल क्रिकेट बेटिंग, पत्रकार जे. डे यांची हत्या, अस्थर अनुह्या, मीनाक्षी थापा, पल्लवी पुरकायस्थ तसेच शक्ती मिलमधील तरुणीवरील बलात्कार आदी प्रकरणांतील त्यांचा तपासही गाजला. २९ मार्च २०१० ते १७ फेब्रुवारी २०१४ या कालावधीत ते क्राइम ब्रँचचे सहपोलिस आयुक्त होते. या पदावर सर्वाधिक कालावधी भूषवण्याचा मानही त्यांच्याकडे जातो.
पोलिस दलाचे नुकसान
हिमांशू रॉय यांचे निधन हे पोलिस दलाचे फार मोठे नुकसान आहे. मुंबई क्राइम ब्रँच, एटीएसमध्ये त्यांनी केलेली कामगिरी कौतुकास्पद होती. एका चांगला अधिकारी आम्ही आज गमावला. ईश्वर त्यांच्या कुटुंबीयांना या धक्क्यातून सावरण्याची शक्ती देवो हीच प्रार्थना. - दत्ता पडसलगीकर, मुंबई पोलिस आयुक्त
पोलिस दलाचे बलस्थान
हिमांशू रॉय कर्तव्यनिष्ठ पोलीस अधिकारी होते. पोलिस दलाचे ते बलस्थान होते. गुन्हे तपासात त्यांचा हातखंडा होता. आपल्या सेवाकाळात धारण केलेल्या प्रत्येक पदावर त्यांनी वैशिष्ट्यपूर्ण कामगिरी केली. त्यांच्या आकस्मिक निधनाने राज्याच्या पोलिस दलाचे मोठे नुकसान झाले आहे. - राज्यपाल सी. विद्यासागर राव
कर्तव्यदक्ष अधिकारी गमावला
हिमांशू रॉय यांनी अनेक महत्त्वाच्या प्रकरणाचा यशस्वीपणे तपास केला आहे. त्यांच्या अकस्मात निधनाने कर्तव्यदक्ष अधिकारी गमावला असून त्यांच्या कुटुंबीयांच्या दु:खात सहभागी आहे. - देवेंद्र फडवणीस, मुख्यमंत्री
धाडसी अधिकारी गेला
रॉय हे धाडसी अधिकारी होते, त्यातील राज्यातील कायदा आणि सुव्यवस्था कायम राखण्यासाठी दिलेल्या सहयोगाबद्दल राज्य नेहमी त्यांना लक्षात ठेवेल. - अशोक चव्हाण, काँग्रेस प्रदेशाध्यक्ष
कालच जिममध्ये भेटलो...
मी त्यांना गुरुवारी जिममध्ये भेटलो. आम्ही साधारण २० मिनिटे संवाद साधला. तुमची त्वचा अधिक काळपट झाली असे त्यांना म्हणताच त्यांनी केमोथेरपीचा हा परिणाम असून ही प्रक्रिया सोपी नाही, असे सांगितले. रॉय हे अतिशय चांगले अधिकारी होते. कॅन्सर झाल्याचे कळताच त्यांनी नोकरी सोडण्याच्या बेतात असल्याचे सांगितले असता त्याऐवजी तुम्ही दीर्घ सुट्टीवर जा, असा सल्ला मी दिला होता. - जयंत पाटील, प्रदेशाध्यक्ष, राष्ट्रवादी काँग्रेस
माझे वैयक्तिक नुकसान
रॉय यांच्या निधनाच्या वृत्ताने धक्का बसला. ते माझे जवळचे मित्रही होते. त्यांच्या निधनाने माझे वैयक्तिक नुकसान झाले आहे. - राधाकृष्ण विखे-पाटील, विरोधीपक्ष नेते
उमदे व्यक्तिमत्त्व हरपले
हिमांशू रॉय हा जिंदादिल माणूस होता. मोठ्या पदावर असून त्यांच्या वागण्याबोलण्यात कोणताही बडेजाव नव्हता. शिपायापासून वरिष्ठ अधिकाऱ्यांना ते अदबीने वागवायचे. कोणालाही ताटकळत ठेवत नसत. त्यांनी कधीही कोणाला दुखावलं नाही. त्यांना व्यायामाची आवड होती. आजारामुळे नैराश्य आल्याने त्यांनी आयुष्य संपवले असावे. - अॅड. उज्ज्वल निकम
सहकाऱ्यांची श्रद्धांजली
१९८८ च्या आयपीएस तुकडीतील अधिकाऱ्यांनी ट्विटर अकांऊंटवरून आपल्या सहकाऱ्यास श्रद्धांजली अर्पण केली आहे. एक धाडसी अधिकारी गमावला असून त्याचे नुकसान कधीही भरून निघणारे नाही, असे त्यात म्हटले आहे.