म. टा. विशेष प्रतिनिधी, मुंबई
दरवर्षीच्या पावसाळ्यात पावसाची एक मोठी सर पडली तरीसुद्धा पाणी तुंबणारे पहिले ठिकाण म्हणजे परळ-हिंदमाता परिसर. यंदा तर पहिल्या पावसातच या परिसराचे तीन-तेरा वाजल्याने आणि कमरेपर्यंत पाणी तुंबल्याने स्थानिक नागरिक, दुकानदार व व्यापारी कमालीचे त्रस्त झाले. 'आम्ही किती वर्षे हा त्रास सहन करायचा', असा संतप्त सवाल त्यांनी मुंबई महापालिकेकडे केला आहे.
परळ नाका परिसरात केईएम, टाटा व जेरबाई वाडिया रुग्णालय तसेच विविध संस्था, कार्यालये असून अनेक चाळीही आहेत. हिंदमाता ते परळ भागात मोठ्या प्रमाणात दुकाने व व्यापारी गाळेही आहेत. त्यामुळे सदैव वाहतूक कोंडी होत असलेल्या या भागात पाणी तुंबल्यानंतर जनजीवन बंद पडण्यासारखी स्थिती होते. 'यंदा तर पहिल्या दोन दिवसांतच गेल्या वर्षीच्या मोठ्या पावसासारखी गंभीर स्थिती पहायला मिळाली. पाण्याचा निचरा जलदगतीने होण्यासाठी जलवाहिन्या बदलल्याचा आणि अन्य उपाय योजल्याचा पालिकेचा दावा फोल ठरत आहे', अशी संतप्त प्रतिक्रिया परळमधील 'मोनालिसा सिरॅमिक्स इंडिया प्रायव्हेट लिमिटेड'चे शेख माशुक सफी यांनी 'म.टा.'कडे व्यक्त केली. तर, 'शनिवारच्या पावसात पाणी तुंबल्याने आम्हाला बाहेर पडणेच कठीण झाले. पोलिस व पालिका कर्मचाऱ्यांनी पेट्रोल पंपापर्यंतही जाण्यास मज्जाव केला. दरवर्षी दुकानात दोन ते तीन फुटांपर्यंत पाणी शिरत असल्याने खूपच त्रास होतो', असे गौरीशंकर छित्तरमल मिठाईवाला दुकानातील विक्रेते नमनेश शर्मा यांनी सांगितले. 'यंदाच्या पावसात पहिल्याच दिवशी आमच्या झोपडीत पाणी शिरले आहे. एकत्र कुटुंबामुळे घरात खूप माणसे असून सात लहान मुलेही आहेत. त्यामुळे सामान पोटमाळ्यावर ठेवून कसेबसे स्वत:ला सावरत आहोत', अशी हतबल प्रतिक्रिया पूनम नाडे यांनी व्यक्त केली.
बालिकेने दिला मदतीचा हात
परळमधील दरवर्षीची गंभीर स्थिती पाहून येथील क्रिस्टल टॉवरमध्ये राहणारी अवघ्या दहा वर्षांची मुलगी झेन हिने आपल्या पालकांकडे आग्रह धरत दोन राफ्टिंग बोट विकत घेतल्या. या बोटींच्या माध्यमातून झेनने तिच्या आई अॅड. जयश्री व वडील अॅड. गुणरतन सदावर्ते यांच्या मदतीने शनिवारी अनेकांना मदत केली. 'गेल्या काही वर्षांपासून लोकांचा त्रास पाहिल्यानंतर झेनने त्यांना मदत करायचे ठरवले. त्यामुळे मला यंदा कुठेही बाहेर फिरायला नेऊ नका, त्याऐवजी दोन राफ्टिंग बोटी विकत घेऊन द्या, असा हट्ट तिने धरला. आम्हीही तो पुरवला. त्यामुळे आज लोकांना मदत करता आल्याचे पाहून तिला खूप आनंद झाला', असे महाराष्ट्र प्रशासकीय प्राधिकरणातील (मॅट) वकील संघटनेचे अध्यक्ष असलेले अॅड. गुणरतन सदावर्ते यांनी 'म.टा.'ला सांगितले.
महिला पोलिसाची कर्तव्यतत्परता
शनिवारच्या पावसात हिंदमाता चौकात गुडघ्यापर्यंत पाणी तुंबले होते. त्यावेळी या भागात कर्तव्यावर असलेल्या महिला पोलिस नाईक रजनी जोगरे यांनी अनेक ज्येष्ठ नागरिक व महिलांना सुरक्षित स्थळापर्यंत जाण्यासाठी मदत केली. काही स्थानिक तरुणही त्यांना याकामी मदत करताना दिसत होते.
दरवर्षीच्या पावसाळ्यात पावसाची एक मोठी सर पडली तरीसुद्धा पाणी तुंबणारे पहिले ठिकाण म्हणजे परळ-हिंदमाता परिसर. यंदा तर पहिल्या पावसातच या परिसराचे तीन-तेरा वाजल्याने आणि कमरेपर्यंत पाणी तुंबल्याने स्थानिक नागरिक, दुकानदार व व्यापारी कमालीचे त्रस्त झाले. 'आम्ही किती वर्षे हा त्रास सहन करायचा', असा संतप्त सवाल त्यांनी मुंबई महापालिकेकडे केला आहे.
परळ नाका परिसरात केईएम, टाटा व जेरबाई वाडिया रुग्णालय तसेच विविध संस्था, कार्यालये असून अनेक चाळीही आहेत. हिंदमाता ते परळ भागात मोठ्या प्रमाणात दुकाने व व्यापारी गाळेही आहेत. त्यामुळे सदैव वाहतूक कोंडी होत असलेल्या या भागात पाणी तुंबल्यानंतर जनजीवन बंद पडण्यासारखी स्थिती होते. 'यंदा तर पहिल्या दोन दिवसांतच गेल्या वर्षीच्या मोठ्या पावसासारखी गंभीर स्थिती पहायला मिळाली. पाण्याचा निचरा जलदगतीने होण्यासाठी जलवाहिन्या बदलल्याचा आणि अन्य उपाय योजल्याचा पालिकेचा दावा फोल ठरत आहे', अशी संतप्त प्रतिक्रिया परळमधील 'मोनालिसा सिरॅमिक्स इंडिया प्रायव्हेट लिमिटेड'चे शेख माशुक सफी यांनी 'म.टा.'कडे व्यक्त केली. तर, 'शनिवारच्या पावसात पाणी तुंबल्याने आम्हाला बाहेर पडणेच कठीण झाले. पोलिस व पालिका कर्मचाऱ्यांनी पेट्रोल पंपापर्यंतही जाण्यास मज्जाव केला. दरवर्षी दुकानात दोन ते तीन फुटांपर्यंत पाणी शिरत असल्याने खूपच त्रास होतो', असे गौरीशंकर छित्तरमल मिठाईवाला दुकानातील विक्रेते नमनेश शर्मा यांनी सांगितले. 'यंदाच्या पावसात पहिल्याच दिवशी आमच्या झोपडीत पाणी शिरले आहे. एकत्र कुटुंबामुळे घरात खूप माणसे असून सात लहान मुलेही आहेत. त्यामुळे सामान पोटमाळ्यावर ठेवून कसेबसे स्वत:ला सावरत आहोत', अशी हतबल प्रतिक्रिया पूनम नाडे यांनी व्यक्त केली.
बालिकेने दिला मदतीचा हात
परळमधील दरवर्षीची गंभीर स्थिती पाहून येथील क्रिस्टल टॉवरमध्ये राहणारी अवघ्या दहा वर्षांची मुलगी झेन हिने आपल्या पालकांकडे आग्रह धरत दोन राफ्टिंग बोट विकत घेतल्या. या बोटींच्या माध्यमातून झेनने तिच्या आई अॅड. जयश्री व वडील अॅड. गुणरतन सदावर्ते यांच्या मदतीने शनिवारी अनेकांना मदत केली. 'गेल्या काही वर्षांपासून लोकांचा त्रास पाहिल्यानंतर झेनने त्यांना मदत करायचे ठरवले. त्यामुळे मला यंदा कुठेही बाहेर फिरायला नेऊ नका, त्याऐवजी दोन राफ्टिंग बोटी विकत घेऊन द्या, असा हट्ट तिने धरला. आम्हीही तो पुरवला. त्यामुळे आज लोकांना मदत करता आल्याचे पाहून तिला खूप आनंद झाला', असे महाराष्ट्र प्रशासकीय प्राधिकरणातील (मॅट) वकील संघटनेचे अध्यक्ष असलेले अॅड. गुणरतन सदावर्ते यांनी 'म.टा.'ला सांगितले.
महिला पोलिसाची कर्तव्यतत्परता
शनिवारच्या पावसात हिंदमाता चौकात गुडघ्यापर्यंत पाणी तुंबले होते. त्यावेळी या भागात कर्तव्यावर असलेल्या महिला पोलिस नाईक रजनी जोगरे यांनी अनेक ज्येष्ठ नागरिक व महिलांना सुरक्षित स्थळापर्यंत जाण्यासाठी मदत केली. काही स्थानिक तरुणही त्यांना याकामी मदत करताना दिसत होते.