‘मला लांबचा प्रवास झेपणार नाही’

म. टा. विशेष प्रतिनिधी, मुंबई

हजारो कोटी रुपयांच्या पंजाब नॅशनल बँक घोटाळ्यात आरोपी असलेला फरार हिरे व्यापारी मेहुल चोक्सी याने आता भारतात येण्यास असमर्थता दर्शवण्यासाठी आपल्या प्रकृतीअस्वास्थ्याचे कारण दिले आहे. 'माझ्या मेंदूमध्ये गाठ असून मला अन्यही आजार आहेत. त्यामुळे मला ४१ तासांचा लांबचा विमान प्रवास झेपणार नाही', असा दावा चोक्सीने आपल्या एका अर्जात केला आहे.

या अर्जाबरोबरच चोक्सीने वेगवेगळे नऊ अर्जही त्याच्या वकिलांमार्फत पीएमएलए न्यायालयात केले आहेत. 'मी संशयास्पद पद्धतीने जानेवारीमध्ये भारताबाहेर गेलो आणि नंतर जाणीवपूर्वक तपासात सहकार्य केले नाही, हा सक्तवसुली संचालनालयाचा (इडी) दावा चुकीचा आहे. मला प्रकृती अस्वास्थ्यामुळे भारतात येणे शक्य होत नाही. मला २०१२पासून वेगवेगळे आजार आहेत. त्यामुळे मला परांगदा आर्थिक गुन्हेगार घोषित करण्याची इडीची तक्रार रद्द करावी', अशी विनंती चोक्सीने अर्जात केली आहे. त्याविषयी उत्तर दाखल करण्याचे निर्देश इडीला देऊन न्या. एम. एस. आझमी यांनी याविषयी १७ नोव्हेंबरला सुनावणी ठेवली.