म. टा. विशेष प्रतिनिधी, मुंबई
महाराष्ट्र राज्य माध्यमिक व उच्च माध्यमिक शाळा मुख्याध्यापक संघ महामंडळाचे ५९वे राज्यस्तरीय अधिवेशन सोलापूर येथे आयोजित करण्यात आले आहे. या अधिवेशनात शनिवारी मुंबईतील तीन शाळांच्या मुख्याध्यापकांचा आदर्श मुख्याध्यापक पुरस्काराने सन्मान करण्यात आला.
महासंघाचे ५९वे राज्यस्तरीय मुख्याध्यापक अधिवेशन सोलापूर येथे सुरू झाले आहे. या अधिवेशनात शैक्षणिक प्रश्न व उपाययोजना यावर विचारमंथन करण्यात येत आहे. शनिवारी शिक्षण संचालक दिनकर पाटील, राज्य शिक्षण मंडळाच्या अध्यक्ष शकुंतला काळे, शिक्षणतज्ज्ञ आणि लोकप्रतिनिधींनी उपस्थितांना मार्गदर्शन केले. तसेच कोल्हापूर जिल्हा मुख्याध्यापक संघाने सुधारित मूल्यमापन योजना व जळगाव जिल्हा मुख्याध्यापक संघाने नवीन शैक्षणिक धोरण २०१९ हे दोन शोधनिबंध सादर केले. या सोहळ्यात मुंबई विभागातील दक्षिण मुंबई विभागातील धारावीमधील छत्रपती शिवाजीराजे भोसले विद्यालयाच्या मुख्याध्यापिका वीणा दोनवलकर, पश्चिम मुंबईतील वांद्रे येथील महात्मा गांधी विद्यालयाचे मुख्याध्यापक बळवंतराव शिंदे आणि उत्तर मुंबई विभागातील चेंबूर हायस्कूल चेंबूरचे मुख्याध्यापक सदानंद परब यांना आदर्श मुख्याध्यापक पुरस्काराने गौरविण्यात आले.