NMCविरोधात उद्या डॉक्टरांचा लाक्षणिक संप

मुंबई: प्रस्तावित नॅशनल मेडिकल कमिशन विधेयकाला( NMC) विरोध दर्शवण्यासाठी इंडियन मेडिकल असोसिएशनने (IMA) उद्या एक दिवसाचा देशव्यापी लाक्षणिक संप पुकारला आहे. या संपामुळे खासगी हॉस्पिटलमधी बाह्यरुग्ण विभाग सेवा बंद राहणार असल्याने रुग्णांना फटका बसण्याची शक्यता आहे. प्रस्तावित विधेयक गरीब आणि सर्वसामान्य नागरिकविरोधी, लोकशाहीविरोधी असल्याचे असोसिएशनचे म्हणणे आहे.

प्रस्तावित विधेयकामुळे नोकरशहा आणि वैद्यकीय सेवेशी संबंधीत नसणाऱ्या प्रशासकाचा वैद्यकीय सेवेवर वरचष्मा राहणार असून यामुळे वैद्यकीय सेवा पंगू बनण्याचा धोका आहे असे असोसिएशनचे म्हणणे आहे. याचा निषेध करण्यासाठी असोसिएशनने उद्याचा संपाचा दिवस 'काळा दिन' पाळण्याचे जाहीर केले आहे.

इंडियन मेडिकल असोसिएशनच्या विद्यार्थ्यांनी यापूर्वीच २ जानेवारीला संपाची हाक दिली आहे. हा संप २ जानेवारीला सकाळी ६ ते संध्याकाळी ६ वाजेपर्यंत असा १२ तासांसाठी करण्यात येणार आहे.

संपकाळात केवळ एमर्जन्सी आणि गंभीर आजारी असलेल्या रुग्णांसाठी वैद्यकीय सेवा पुरवण्यात येणार असल्याचे असोसिएशनने जाहीर केले आहे.