म. टा. प्रतिनिधी, मुंबई
लहान आतड्याची कार्यक्षमता कमी झाली किंवा रक्तपुरवठा होण्यामध्ये अडचण निर्माण झाली तर आतडे काढून टाकण्याखेरीज पर्याय नसतो. अशावेळी रुग्णांमध्ये आतड्याचे प्रत्यारोपण करावे लागते, मात्र त्याची उपलब्धता सहज होत नाही. असे असताना मुंबईत हे प्रत्यारोपण यशस्वीरित्या पार पडले आहे. मुंबईतील ४८ वर्षीय महिलेचे लहान आतडे पुण्यातील एका व्यक्तीला प्रत्यारोपित करण्यात आले आहे. राज्यात पहिल्यांदाच लहान आतड्याचे हे प्रत्यारोपण करण्यात आले आहे.
टिळकनगर येथील एका रुग्णालयात ४८ वर्षीय महिला ब्रेनडेड झाल्यावर तेथील अतिदक्षता विभागातील डॉ. अवंती भावे, डॉ. कुशल बांगर यांच्यासह रुग्णालय प्रशासनाने नातेवाईकांचे अवयवदान करण्यासाठी समुपदेशन केले. अवयव प्रत्यारोपण समन्वय समितीनेही हे प्रत्यारोपण व्हावे यासाठी महत्त्वाची कामगिरी बजावली. 'झेडटीसीसी'च्या मार्गदर्शनाखाली मुलुंडच्या फोर्टीस रुग्णालयामध्ये ही प्रक्रिया करण्यात आली. येथे रुग्णाचे लहान आतड्यासह स्वादुपिंड, मूत्रपिंड, यकृताचे दान करण्यात आले होते.