परीक्षचे महत्त्व घटतेय!

sourabh.sharma1@timesgroup.com

Tweet : @sourabhsMT

मुंबई : काही वर्षांपासून दहावीच्या विद्यार्थ्यांना तोंडी परीक्षा आणि प्रात्यक्षिकांमुळे गुणांची खैरात मिळत आहे. त्यामुळे विद्यार्थ्यांमधील परीक्षेचे महत्त्व कमी झाले आहे. यातच शिक्षण विभागाने दहावीत गणित आणि इंग्रजी विषयाला वैकल्पिक विषयांचा पर्याय दिल्यास परीक्षेबाबत गंभीरताच उरणार नाही, असे मुंबईसह राज्यातील अनेक मुख्याध्यापकांचे म्हणणे आहे.

दहावीच्या बोर्डाच्या परीक्षेत विद्यार्थ्यांना अवघड जाणाऱ्या गणित आणि इंग्रजी या विषयाला वैकल्पिक पर्याय देण्याचा विचार सुरू असल्याची घोषणा शिक्षणमंत्र्यांनी नुकतीच केली होती. त्यावरून शिक्षणक्षेत्रात सध्या जोरदार चर्चा सुरू असून, अनेक शिक्षकांनी याला विरोध दर्शविला आहे. अगोदरच पहिली ते आठवीपर्यंत नापास न करण्याच्या धोरणामुळे परीक्षेचे महत्त्व कमी झाले आहे. वैकल्पिक विषयांच्या पर्यायामुळे त्यात आणखीन भर पडेल, असे त्यांचे मत आहे. या पार्श्वभूमीवर मुख्याध्यापकांनीही या प्रस्तावावर विरोधाची फुल्ली मारली आहे.

पहिली ते आठवीपर्यंत विद्यार्थ्यांना नापास न करण्याच्या धोरणामुळे अगोदरच विद्यार्थ्यांना परीक्षेबद्दल गंभीरता राहिलेली नाही. त्यात आता गणित आणि इंग्रजी विषयाला पर्याय दिल्यास त्यांचा परीक्षेकडील पाहण्याचा दृष्टिकोन बदलेल. इंग्रजी विषय विद्यार्थ्यांना अवघड जाऊ नये म्हणून शाळास्तरावर मोठ्या प्रमाणात प्रयत्न होताना दिसत आहेत. ब्रिटिश कौन्सिल किंवा इतर अन्य संघटनेची मदत घेतली जात आहे. दहावीच्या विद्यार्थ्यांना गणित हा विषय अवघड जात असल्याने काही वर्षांपूर्वी सामान्य गणित ही संकल्पना सुरू केली गेली. सामान्य गणिताचे रूपांतर अंक गणितात केल्यास विद्यार्थ्यांना फायदा होईल, असे मुख्याध्यापक संघ महामंडळाचे प्रवक्ते प्रशांत रेडीज यांनी सांगितले.