मुंबईत पावसाची संततधार, लोकल विस्कळीत

मटा ऑनलाइन वृत्त । मुंबई

मुंबई शहर व उपनगरात मध्यरात्रीपासून सुरू असलेल्या पावसानं आज एक बळी घेतला. पश्चिम उपनगरातील मालाड येथे झाड गाडीवर कोसळून एका कारचालकाचा मृत्यू झाला. पावसाची संततधार सकाळीही सुरूच राहिल्यानं रेल्वे, रस्ते व हवाई वाहतुकीला मोठा फटका बसला आहे. मुंबईतील सर्वाधिक गर्दीच्या समजल्या जाणाऱ्या ईस्टर्न व वेस्टर्न एक्स्प्रेस वेवर वाहतुकीची प्रचंड कोंडी झाली आहे. तर, तांत्रिक बिघाडामुळं ट्रान्स हार्बर मार्गावरील ठाणे-पनवेल वाहतूक ठप्प झाली आहे.

रेल्वे रुळांवर पाणी साचल्यामुळं पश्चिम व मध्य रेल्वेच्या लोकल सेवेवर परिणाम झाला असून या मार्गावरील गाड्या २० ते २५ मिनिटं उशिरानं धावत होत्या. त्यामुळं सकाळी ऑफिस गाठण्यासाठी निघालेल्या चाकरमान्यांची तारांबळ उडाली. ट्रान्स हार्बर मार्गावरील नेरुळ स्टेशनात तांत्रिक बिघाड झाल्यानं ठाणे-पनवेल वाहतूक ठप्प झाली. त्यामुळं या मार्गावरील स्थानकांवर प्रवाशांची प्रचंड गर्दी झाली होती.

मुंबईतील सखल भागांत पाणी साचल्याने रस्त्यावरील वाहतुकीची दैना उडाली आहे. पाणी तुंबल्यानं अंधेरी सब-वे वाहतुकीसाठी बंद करण्यात आला आहे. अनेक मार्गांवर वाहतूक अत्यंत धीम्या गतीने सुरू आहे. धावपट्टीवरील पाणी व कमी दृश्यमानतेमुळे विमान वाहतूक १५ ते २० मिनिटं उशिरानं उड्डाण घेत आहेत. किंग्ज सर्कलमध्ये रस्ता पाण्याखाली गेला आहे. मुंबई शहरात ३९.२९ मिमी, पूर्व उपनगरात ३९.३९ मिमी. आणि पश्चिम उपनगरात ५० मिमी पावसाची नोंद झाल्याची प्राथमिक माहिती आहे.

मालाडमध्ये एक ठार, दोन अडकले!

मालाडमध्ये एका कारवर झाड कोसळून कार चालकाचा जागीच मृत्यू झाला. सुंदर नगर भागात ही दुर्घटना घडली. झाडाखाली अडकलेल्या इतर दोघांना बाहेर काढण्याचे प्रयत्न सुरू आहेत.