शाब्बास मुंबई पोलीस! रुम सर्व्हिस बॉय बनून गेले अन् नर्सचे प्राण वाचले; आत्महत्या टळली

मुंबई: पोलिसांनी दाखवलेल्या सतर्कतेमुळे एका नर्सचे प्राण वाचले. आत्महत्या करण्याच्या विचारात असलेल्या तरुणीला पोलिसांनी योग्य वेळी गाठलं. त्यानंतर तिच्या कुटुंबीयांशी संपर्क साधण्यात आला. तरुणीला तिच्या कुटुंबाच्या ताब्यात देण्यात आलं.

खार पोलीस स्थानकाच्या कर्मचाऱ्यांनी रुम सर्व्हिस बॉय म्हणून अंधेरी पूर्वेतील एका हॉटेलमधील रुमचं दार ठोठावलं. एका २२ वर्षीय तरुणीनं दार उघडलं. तिनं २४ तास काहीच खाल्लेलं नव्हतं. स्वत:ला संपवण्याच्या हेतूनं तरुणी हॉटेलमध्ये आली होती. पोलिसांना तिच्याकडे ब्लेड, सुरा आणि स्कार्फ सापडला.

तरुणीला ताब्यात घेतल्यानंतर पोलिसांनी तिची चौकशी केली. तरुणी नर्स म्हणून पश्चिम उपनगरातील एका रुग्णालयात काम करत असल्याचं चौकशीतून समजलं. डिसेंबर २०२१ पासून तरुणी नर्स म्हणून काम करते. अतिशय जास्त काम असल्यानं ती तणावाखाली गेली. पोलिसांनी मोबाईल लोकेशनच्या मदतीनं तरुणीला शोधून काढलं.
पुढील बर्थडेच्या शुभेच्छा! केकमध्ये सल्फर मिसळलं, पत्नी, मुलीसह इंजिनीयरची आत्महत्या
तरुण नर्सनं हॉटेल रिसेप्शनला तिची खरीखुरी ओळखपत्रं दाखवली होती. २७ जुलैला ती हॉटेलमध्ये गेली. नर्स कामावर नसल्याचं लक्षात आल्यानं रुग्णालयाकडून पोलिसांत तक्रार नोंदवण्यात आली. २७ जुलैला संध्याकाळी ४.३० वाजता नर्स बेपत्ता असल्याची तक्रार रुग्णालयाकडून नोंदवली गेली.

अतिशय जास्त काम असल्यानं ताण आल्याचं तरुणीनं पोलिसांना सांगितलं. काही दिवसांपासून मनात सातत्यानं आत्महत्येचे विचार येत होते. आपण का जगत आहोत, असा प्रश्न पडत होता, असं तरुणीनं सहायक पोलीस निरीक्षक संतोष कानसे यांना सांगितलं. तरुणीला वाचवणाऱ्या पोलीस पथकात कानसे यांचा समावेश होता.
बाल्कनीतून पडलेला मोबाईल वाकून बघताना तोल गेला; वसईत साडे तीन वर्षांच्या मुलीचा मृत्यू
तरुणी बेपत्ता झाल्याची तक्रार मिळताच खार पोलिसांनी सूत्रं हलवली. तरुणीला शोधण्यात डीसीपी मंजुनाथ सिंगे आणि त्यांच्या टीमनं मोलाची भूमिका बजावली. तरुणीचा शोध लागल्यानंतर तिच्या कुटुंबाशी संपर्क साधण्यात आला. तरुणीचे आई, वडील सांगलीत असतात. मुलीची माहिती मिळताच तातडीनं मुंबईला निघाले.