वर्धापन दिन विशेष
दादर माटुंगा सांस्कृतिक केंद्राच्या ६७व्या वर्धानपन दिनानिमित्त १५ ते १७ नोव्हेंबर या कालावधीत दररोज सायंकाळी पाच वाजता संस्थेच्या सभागृहात विशेष कार्यक्रमांचे आयोजन करण्यात आले आहे. शुक्रवारी, १५ नोव्हेंबरला जयपूर अत्रौली घराण्याचे सुप्रसिद्ध गायक पं. रघुनंदन पणशीकर यांच्या शास्त्रीय गायनाचा कार्यक्रम होईल. १६ नोव्हेंबरला सरोदवादक पं. पार्थो सारथी यांच्या सरोदवादनाचा तर १७ नोव्हेंबरला ज्येष्ठ नामवंत गायक पद्मश्री पं. उल्हास कशाळकर यांचे शास्त्रीय गायनाचा कार्यक्रम होईल. कार्यक्रम विनामूल्य. प्रवेशिका घेणे बंधनकारक. या प्रवेशिका ८ नोव्हेंबरपासून संस्थेच्या कार्यालयात उपलब्ध आहेत. संपर्क : २४३०४१५०
विद्यार्थी गुणगौरव
अखिल भारतीय सानेगुरूजी कथामाला, वरळी कोळीवाडा शाखेच्या वतीने दहावी आणि बारावीच्या परीक्षेत उल्लेखनीय यश मिळवणाऱ्या विभागातील विद्यार्थ्यांचा गुणगौरव करण्यात येणार आहे. हा कार्यक्रम रविवारी, २४ नोव्हेंबरला सकाळी ९.३० वाजता श्री हनुमान मंदिर, वरळी कोळीवाडा येथे होणार आहे. यासाठी विद्यार्थ्यांनी आपल्या गुणपत्रिकेची सत्यप्रत देवकीनंदन मुकादम - ९८१९१८४१८४ यांच्याकडे १७ नोव्हेंबरपर्यंत आणून द्यावी, असे आवाहन करण्यात आले आहे
'अभिनयधारा'चा वर्धापन दिन
भांडुप (प.) येथील अभिनयधारा कला संस्थेच्या वतीने मराठी रंगभूमी दिन आणि संस्थेचा ३२वा वर्धापन दिन याचे औचित्य साधून उद्या, मंगळवारी विशेष सोहळ्याचे आयोजन करण्यात आले आहे. हा सोहळा भांडुप (प.) येथील सह्याद्री विद्यामंदिर येथे सायंकाळी ७ वाजता होणार आहे. या सोहळ्याला अनेक नामांकित तसेच स्थानिक कलाकार उपस्थित राहणार असून कलाविष्कार देखील सादर केले जाणार आहेत, अशी माहिती संस्थेचे अध्यक्ष विजय सूर्यवंशी यांनी दिली.
हौजी राईड
महाराष्ट्र शासनाच्या पुरातत्व तसेच क्रीडा विभागातर्फे सामाजिक बांधिलकी, पुरातन वास्तू संवर्धन तसेच वाहनांची सुरक्षा असा संदेश घेऊन येणारी अनोखी क्रीडा स्पर्धा 'हौजी राईड' या नावाने २४ नोव्हेंबरपासून सुरू होत आहे. यंदा स्पर्धकांनी स्पर्धा खेळतच मुंबईतील पुरातत्त्व विभागाने सांस्कृतिक वारसा जतन करणारी काही स्थळे निश्चित केली असून दुचाकीवरून स्पर्धकांना त्याचा ठावठिकाणा शोधावा लागणार आहे. त्याचबरोबर यंत्रणेच्या माध्यमातून सुरक्षित वाहन चालविण्याचे निकष तपासून स्पर्धकांना एकूण दहा लाख रुपयांची वेगवेगळ्या वर्गवारीतील पारितोषिके दिली जाणार आहेत. नावनोंदणी बंधनकारक. संपर्क: ९०८२३७५३८३