मुलांचे लसीकरण वाढवा, स्वतंत्र ओपीडी सुरू करा; आरोग्य मंत्री तानाजी सावंत यांच्या सूचना

मुंबई: मुलांचे लसीकरण वाढवा, मुलांसाठी स्वतंत्र ओपीडी सुरू करावी आणि सर्व्हेक्षण करुन संशयित लक्षणं असणारे मुलांवर लक्ष ठेवा, अशा सूचना सार्वजनिक आरोग्य मंत्री प्रा. डॉ. तानाजी सावंत यांनी आज येथे मुंबई महानगर पालिका अधिकाऱ्यांना दिल्या.

श्री. सावंत यांनी मुंबई महापालिकामार्फत शहरातील काही भागात राबविण्यात येणाऱ्या गोवर प्रतिबंधक उपाययोजनांचा आढावा घेण्यासाठी बैठक घेतली. त्या बैठकीत त्यांनी या सूचना दिल्या.

बैठकीस सार्वजनिक आरोग्य विभागाच्या प्रधान सचिव संजय खंदारे, महापालिका अतिरिक्त आयुक्त डॉ. संजीव कुमार, राष्ट्रीय आरोग्य अभियानाचे संचालक आणि आयुक्त डॉ. तुकाराम मुंढे, महापालिकेच्या आरोग्य अधिकारी डॉ. मंगला गोमारे, जागतिक आरोग्य संघटनेचे तज्ञ डॉ. राहुल शिंपी, राज्य साथरोग अधिकारी डॉ प्रदीप आवटे आदी उपस्थित होते.

डॉ. संजीव कुमार यांनी सांगितले की मुंबई शहरातील आठ वॉर्ड मध्ये मुलांना गोवरची लक्षणं आहेत. या भागात पथकांमार्फत मुलांचे सर्व्हेक्षण करण्यात येत आहे. लक्षणे आढळल्यास मुलांना तत्काळ दवाखान्यात दाखल करण्यात येत आहे. गेल्या काही दिवसांपासून सुमारे दहा हजार मुलांना लसीकरण केले आहे. येत्या काही दिवसांत सुमारे पन्नास हजारांहून अधिक मुलांना लसीकरण करण्याचे नियोजन केले आहे.

यावर श्री. सावंत यांनी सांगितले की, संबंधित आठ वॉर्ड मध्ये विशेष पथकांच्या व्दारे सर्व्हेक्षण करा. यासाठी आवश्यक असल्यास सार्वजनिक आरोग्य विभागाचे मनुष्यबळ पुरवले जाईल. मुंबई बरोबरच गोवरची लक्षणे आढळलेल्या मालेगाव आणि भिवंडी निजामपूर महानगरपालिका परिसरातही सर्व्हेक्षण करावे. तेथेही लसीकरण वाढवा. मुलांचे लसीकरण करण्यासाठी पालकांचे समुपदेशन करा. समुपदेशन करण्यासाठी पथकांची नियुक्ती करण्यात यावी. यावेळी डॉ. मंगला गोमारे यांनी मुंबई महापालिका राबवत असलेल्या प्रतिबंधक उपाययोजनांची माहिती दिली.