मौखिक कर्करोगाचे प्रमाण वाढते

म. टा. खास प्रतिनिधी, मुंबई

कर्करोगाच्या प्रमाणामध्ये मागील काही वर्षांमध्ये वाढ झाली आहे असे वैद्यकीय तज्ज्ञांकडून सांगितले जात असून, 'इंडियन कौन्सिल ऑफ मेडिकल रीसर्च'ने (आयसीएमआर) केलेल्या अभ्यासातून त्याला पुष्टी मिळाली आहे. भारतातील सहा वर्षांच्या आकडेवारीवरून हे प्रमाण लक्षणीयरित्या वाढल्याचे दिसून येत आहे. भारतीय पुरुषांमध्ये ओठ आणि मौखिक पोकळीचा (तोंडातील पोकळी) कर्करोग जास्त प्रमाणावर आढळून येत असल्याचे हा अभ्यास सांगतो, तर फुफ्फुसांचा कर्करोग यादीत चौथ्या क्रमांकावर असून त्याच्या रुग्णांमध्ये ६.४५ टक्क्यांनी वाढ झाली आहे.

'आयसीएमआर'ने नुकताच भारतातील राज्यांनुसार आजारांसंदर्भातला एक अहवाल प्रकाशित केला आहे. त्यामध्ये महाराष्ट्रातील ४० ते ६९ वर्षे वयोगटांतील मृत्यूंमध्ये कर्करोगाचा वाटा ११.५ टक्के असून या वयोगटातील मृत्यूंमागचे ते दुसरे मोठे कारण आहे. याच वयोगटातील मृत्यूचे दुसरे महत्त्वाचे कारण हे हृदयविकाराचा झटका येणे हे आहे.

एकशे चाळीस देशांतील ३६ कोटी व्यक्ती या धूम्रपानविरहीत तंबाखूचे सेवन करतात आणि त्यामुळे जगभरात ६ लाख ५० हजार व्यक्तींचा मृत्यू होतो. त्यापैकी भारतात जवळपास २० कोटी लोक धूम्रपानविरहीत तंबाखूचे सेवन करतात आणि त्यामुळे दरवर्षी ३ लाख ५० हजार व्यक्तींचा मृत्यू होतो. या अभ्यासात स्तनांच्या वाढत्या कर्करोगाचे प्रमाणही नमूद करण्यात आले आहे.

चौकट एक..

जागतिक आरोग्य संघटनेच्या अहवालातील निरीक्षणे

जागतिक आरोग्य संघटनेच्या 'ग्लोबोकॉन २०१८' या अहवालात वरील निरीक्षणे मांडली आहेत. हा अहवाल १८५ देशांतील ३६ प्रकारच्या कर्करोगाच्या घटना व मृत्यूदरावर आधारित आहे. भारतात २०१२ मध्ये ५६ हजार केसेस नोंदवण्यात आल्या आहेत. २०१२ मध्ये १.४ लाखांवरून २०१८ मध्ये हे प्रमाण १.६ लाखांवर गेले आहे.