वाढीव झालेले मतदान परिवर्तनासाठीच: शेलार

मटा ऑनलाइन वृत्त। मुंबई

मुंबई महापालिका निवडणुकीत यापूर्वीचे मतदान हे ४४-४५% झाले होते. यावेळी मात्र ५४% पर्यंत मतदान पोहोचण्याची शक्यता आहे. अंतिम आकडा अद्याप येणे बाकी आहे. गेल्या वेळेपेक्षा वाढीव १०% मतदान झाल्याची शक्यता आहे असे म्हणत मुंबई भाजप अध्यक्ष आशीष शेलार यांनी यावेळी परिवर्तन होणार असल्याचे म्हटले आहे. या परिवर्तनासाठी त्यांनी मुंबईकरांचे धन्यवाद ही मानले आहेत.

यावेळी मुंबईतील मतदानाला अतिशय उत्स्फूर्त असा सकारात्मक प्रतिसाद मिळाला. मतदानाची टक्केवारी वाढते ती परिवर्तनासाठी आणि बदलासाठी असते असे म्हणत मुंबईत भाजप क्रमाक १चाच पक्ष असेल असे शेलार यांनी सूचित केले.

गेल्या विधानसभा निवडणुकीत एकूण ५४% मतदान झालं. त्या वेळी भाजपला मुंबईत १५ जागा मिळाल्या होत्या . विधानसभेसाठी जर भाजपला मुंबईत १५ जागा मिळाल्या असतील, तर आताचे चित्र काय असेल याबाबत निष्कर्ष काढण्यासाठी आपण सारे सुज्ञ आहात अशा शब्दात शेलार यांनी भाजपच्या विजयाचे संकेत दिले

शेलार म्हणाले की, मुंबईतल्या कार्यकर्त्यांनी करून दाखवले आहे. त्यांनी नियोजन करून उंच टॉवर, इमारती, बिल्डिंग, चाळी यांतून मतदारांना बाहेर काढले. त्याबद्दल कार्यकर्त्यांचे अभिनंदनही त्यांनी केले.

मतदार याद्यांमध्ये असलेल्या चुका, बदललेली केंद्रे आणि मतदारांची गळलेली नावे अशी परिस्थिती असतानाही मतदान वाढणे याचाच अर्थ हे मतदान परिवर्तनासाठी आहे हे जनतेने स्पष्ट केले असेही शेलार म्हणाले.