गणपतीसाठी गावी जाताय; उद्यापासून करता येणार गणेशोत्सव विशेष गाड्यांचे बुकिंग, प्रक्रिया जाणून घ्या

म. टा. प्रतिनिधी, मुंबईः लाडक्या बाप्पाच्या स्वागतासाठी कोकणात जाणाऱ्या चाकरमान्यांचा प्रवास सुखरूप व्हावा यासाठी मध्य रेल्वेने लोकमान्य टिळक टर्मिनस ते कुडाळ/सावंतवाडी दरम्यान सहा विशेष रेल्वेगाड्या चालवण्याचा निर्णय घेतला आहे. उद्या, सोमवारी स्वातंत्र्यदिनाच्या मुहूर्तावर या गाड्यांचे आरक्षण खुले होणार आहे. या अतिरिक्त गाड्यांसह मध्य रेल्वेवरील एकूण गणपती विशेष गाड्यांची संख्या २१२ झाली आहे.

मुंबई-कुडाळ गणपती विशेष

- २४ ऑगस्टला रात्री १२.४५ वाजता (०११६७) विशेषगाडी लोकमान्य टिळक टर्मिनस येथून कुडाळच्या दिशेने रवाना होणार असून ही गाडी त्याच दिवशी सकाळी ११.०० वाजता कुडाळला पोहोचेल.

- कुडाळहून (०११६८) ही गाडी २५ ऑगस्ट रोजी सकाळी ११ वाजता निघेल आणि मुंबईत त्याच दिवशी रात्री ११.५५ वाजता दाखल होईल.

पनवेल-कुडाळ गणपती विशेष

- २४ ऑगस्टला कुडाळहून (०११७०) दुपारी १२ वाजता सुटेल आणि पनवेलला त्याच दिवशी रात्री १०.५५ला दाखल होईल.

- २५ ऑगस्ट रोजी पनवेलहून विशेष गाडी (०११६९) रात्री १२.१० वाजता सुटेल आणि कुडाळ स्थानकात त्याच दिवशी सकाळी ९ वाजता पोहोचेल.

मुंबई-सावंतवाडी रोड गणपती विशेष

- लोकमान्य टिळक टर्मिनसहून (०११७१) ही गाडी २५ ऑगस्टला पहाटे ४.५५ला सुटेल आणि सावंतवाडी रोड येथे दुसऱ्या दिवशी संध्याकाळी ४ वाजता पोहोचेल.

- या गाडीचा (०११७२) परतीचा प्रवास २६ ऑगस्टला पहाटे ४ वाजता सुरू होईल आणि एलटीटी येथे त्याच दिवशी संध्याकाळी ५ वाजता दाखल होईल.


- विशेष गाड्यांचे आरक्षण १५ ऑगस्टपासून सर्व संगणकीकृत आरक्षण केंद्रांवर आणि www.irctc.co.in या संकेतस्थळावर सुरू होईल.

- गाड्यांच्या तपशीलवार माहितीसाठी www.enquiry.indianrail.gov.in ला भेट द्या किंवा NTES ॲप डाऊनलोड करा.