अखेरच्या डागडुजीसाठी ‘विराट’ कोचीला

गोदीत उतरविणार इंजिने, परतीचा प्रवास टोईंगने

म. टा. विशेष प्रतिनिधी, मुंबई

जगातील सर्वाधिक काळ म्हणजेच, सुमारे ५८ वर्षे सक्रिय राहिलेल्या ‘आयएनस विराट’ या विमानवाहू युद्धनौकेच्या फ्लाइटडेकवरून विविध प्रकारची विमाने व हेलिकॉप्टर्स यांनी २२ हजार ३४ तासांचे उड्डाण केले आहे… २८ हजार टनांच्या या नौकेने पाण्यातून एकूण २२५० दिवस व १० लाख ९४ हजार २१५ किलोमीटरचा प्रवास केला आहे… शनिवारी मात्र विराटच्या डेकभोवती हेलिकॉप्टर्स हवेत भिरभिरली ती तिला सलामी देण्यासाठी... विराटच्या स्वबळावरच्या अखेरच्या प्रवासाला शुभेच्छा देण्यासाठी… या वर्षात निवृत्त होणारी ‘आयएनएस विराट’ शनिवारी मुंबई बंदरातून कोचीच्या दिशेने रवाना झाली.

‘आयएनएस विराट’ची इंजिने आता अखेरची धडधडली आहेत. तिला आयुष्यभर साथ देणारे बॉयलर्स, इंजिने ही कोचीहून परतीच्या प्रवासात तिच्यासोबत नसतील. कोचीला पोहोचल्यानंतर कोचीन गोदीमध्ये तिची अखेरची अत्यावश्यक डागडुजी होणार आहे. त्याला इसेन्शिअल रिपेअर्स आणि ड्रायडॉकिंग म्हणतात. त्यात सुक्या गोदीत तिची मरम्मत करण्यात येईल. विराटच्या या अखेरच्या प्रवासासाठी शुभेच्छा देण्याकरिता नौदलाच्या पश्चिम कमांडचे प्रमुख व्हाइस अॅडमिरल गिरीश लुथ्रा व अन्य वरिष्ठ अधिकारी उपस्थित होते. वेगवान अटकाव नौका व हेलिकॉप्टर्सनी विराटला मुंबई बंदरातून बाहेर निघताना साथ दिली.

‘आयएनएस विराट’ने ब्रिटिश शाही नौदलात हर्मिस या नावाने २७ वर्षे सेवा दिली. त्यानंतर भारतीय तिरंगा फडकावून ‘आयएनएस विराट’ या नावाने ती २९ वर्षे भारतीय नौदलाच्या सेवेत होती. अमेरिकेबरोबर मलबार, फ्रेंच नौदलाबरोबर वरुण, ओमान नौदलाबरोबर नसीम-अल-बहार, तसेच ऑपरेशन ज्युपिटर (१९८९) व १९९९ मध्ये ऑपरेशन विजय या काळातही तिने महत्त्वपूर्ण भूमिका बजावली. विराटवरील सी हॅरिअर ही लढाऊ विमाने मे २०१६मध्ये निवृत्त झाली.