चौकशी समितीने केली कमला मिलची पाहणी

म. टा. विशेष प्रतिनिधी, मुंबई

कमला मिल आग दुर्घटनेच्या चौकशीसाठी न्यायालयाने राज्य सरकारला समिती नियुक्त करण्याचे आदेश दिले होते. त्यानुसार नेमलेल्या समितीने मुंबई उच्च न्यायालयाचे निवृत्त न्या. एस. व्ही.सावंत यांच्या अध्यक्षतेखाली शनिवारी वन अबव्ह आणि मोजोस या दोन्ही पबची पाहाणी केली.

मागील वर्षी २९ डिसेंबरला मध्यरात्री वन अबव्ह आणि मोजोस या दोन पबना लागलेल्या आगीत १४ जणांचा मृत्यू झाला होता. या प्रकरणी दोन्ही पबच्या मालकांना अटक करण्यात आली आहे. या दुर्घटनेसाठी पालिकेच्या अधिकाऱ्यांचा निष्काळजीपणा कारणीभूत असल्याने त्यांच्यावरही कारवाई करावी, अशी याचिका निवृत्त पोलिस अधिकारी ज्युलियो रिबेरो यांनी न्यायालयात दाखल केली होती. या याचिकेवर सुनावणी करताना न्यायालयाने सरकारला चौकशी समिती नियुक्त करण्याचे आदेश दिले होते.

उच्च न्यायालयाचे निवृत्त न्या. एस. व्ही. सावंत यांच्या अध्यक्षतेखाली वास्तुविशारद वसंत ठाकूर, पालिकेचे माजी आयुक्त के. नलिनाक्षन यांच्या समितीने शनिवारी घटनास्थळी पाहणी केली. दोन्ही पबमधून बाहेर पडण्याचा मार्ग बंद असल्याने १४ जणांचा बळी गेला असल्याचा ठपका ठेवण्यात आला होता. त्यानुसार या समितीने लिफ्टने पबमध्ये जाऊन, जिन्याने खाली उतरून पाहणी केली. सुमारे पाऊण तास या समितीने ही पाहाणी केली. पालिकेचे उपायुक्त चंद्रशेखर चौरे, सहाय्यक आयुक्त देवेंद्रकुमार जैन हेही यावेळी उपस्थित होते. ३१ ऑगस्टपर्यंत आपला अहवाल सादर करणार असल्याचे समितीने स्पष्ट केले आहे.