सायली परब : खेळाडू...प्रशिक्षक...आंतरराष्ट्रीय पंच

मुंबई : राष्ट्रीय स्तरावरील बॅडमिंटनपटू, प्रशिक्षक आणि पंच अशी वैविध्यपूर्ण कामगिरी सायली परब यांच्या नावावर जमा आहे. बेस्ट उपक्रमामध्ये सन २०००पासून सेवा बजावणाऱ्या 'अष्टपैलू' परब यांनी खेळाडू, प्रशिक्षक ते राष्ट्रीय पंच असा प्रवास पूर्ण केला आहे.

खेळांची आवड आणि कबड्डीपटू असलेल्या वडिलांचा वारसा सायली परब यांनी जपला आहे. शाळा, कॉलेजमध्ये अॅथलेटिक्ससह विविध खेळांमध्ये प्रावीण्य मिळविलेल्या परब यांनी विवाहानंतरही खेळाचे यशोशिखर गाठले. बेस्टच्या प्रशासकीय विभागात नोकरी करतानाच त्यांनी बॅडमिंटन रॅकेटवर अधिक लक्ष केंद्रीत केले. गेली १५ वर्षे त्या मुंबईसह राज्य, राष्ट्रीय पातळीवर बेस्ट उपक्रमाचे प्रतिनिधित्व करत आहेत. सन २०१२मध्ये त्यांची मुंबई संघात निवड झाली. उटी, हरिद्वार, कोईम्बतूर, विशाखापट्टणम, मुंबई, धर्मशाळा, जयपूरमधील स्पर्धांमध्ये त्यांनी राज्याचे प्रतिनिधित्व केले आहे.

ऐरोलीमध्ये राहणाऱ्या सायली यांनी पती, मुलगी व सहकाऱ्यांच्या सहकार्याने सर्व आव्हाने पेलली. नोकरी व कौटुंबिक जबाबदारी पार पाडतच खेळाडू म्हणून नावलौकिक मिळवितानाच प्रशिक्षक म्हणूनही यशस्वी कारकीर्द घडविली. त्यांच्या हाताखाली तयार झालेले खेळाडू मुंबई जिल्हा, राज्य, राष्ट्रीय स्तरावरील विविध स्पर्धांत यशस्वी ठरत आहेत. त्यांची मुलगीही बॅडमिंटनची आवड जपत स्पर्धा गाजवित आहे.

बॅडमिंटनचे नियम समजून घेताना त्यांच्यात पंच होण्याची आवड निर्माण झाली. त्यासाठी शिस्तबद्ध अभ्यास, आवश्यक त्या सर्व परीक्षा उत्तीर्ण झाल्यानंतर पंच म्हणून त्यांची कारकीर्द सुरू झाली. सर्वप्रथम सन २०१५मध्ये त्यांची राष्ट्रीय स्तरावर पंच म्हणून निवड झाली. राष्ट्रीयच नव्हे तर आंतरराष्ट्रीय स्तरावरही त्यांनी पंच म्हणून जबाबदारी पेलली आहे. भारतात झालेल्या जागतिक स्पर्धांसाठी पंच म्हणून त्यांची निवड झाली आहे.