मल्ल्या परागंदा आर्थिक गुन्हेगार?

म. टा. विशेष प्रतिनिधी, मुंबई

अनेक बँकांची नऊ हजार कोटींहून अधिकची कर्जे बुडवून फरार झालेला उद्योगपती विजय मल्ल्या याला परांगदा आर्थिक गुन्हेगार घोषित करायचे की नाही, याविषयीची सुनावणी आता ३ सप्टेंबरला होणार आहे.

आर्थिक घोटाळे करून देशाबाहेर पलायन करणाऱ्या आरोपींना चाप लावण्यासाठी केंद्र सरकारने नवा कायदा केला आहे. त्याअंतर्गत न्यायालयीन प्रक्रिया टाळणाऱ्या आरोपींना न्यायालयाकडून परागंदा आर्थिक गुन्हेगार घोषित करण्यात आल्यानंतर त्यांची संपत्ती जप्त करण्याची तरतूद आहे. त्यानुसार, अंमलबजावणी संचालनालयाने (ईडी) मल्ल्याविरोधात आरोपपत्र दाखल करून मल्ल्याला परागंदा आर्थिक गुन्हेगार घोषित करण्याची विनंती केली होती.

न्या. एम. एस. आझमी यांनी याविषयी सोमवारी सुनावणी ठेवली होती. मात्र, मल्ल्या तसेच त्याच्या नातेवाईकाच्या वकिलांनी आणि अन्य पक्षकारांनी यासंदर्भातील कागदपत्रांची मागणी 'ईडी'कडे करत सुनावणी पुढे ढकलण्याची विनंती केली. त्यामुळे न्यायाधीशांनी याविषयीची सुनावणी ३ सप्टेंबरला ठेवली, अशी माहिती 'ईडी'च्या अधिकाऱ्यांनी दिली.