म. टा. प्रतिनिधी, मुंबई
लालबागच्या राजाच्या दरबारापासून मुंबईतील अनेक गणेशोत्सव मंडळांमध्ये शनिवारी भारतीय अंतराळ संस्था (इस्रो) आणि 'चांद्रयान २' मोहिमेत सहभागी शास्त्रज्ञांचा जयजयकार सुरू होता. अंतराळ इतिहास रचण्याची भारताची संधी थोडक्यात हुकली असली तरी, ही मोहिम फत्ते करण्यासाठी दिवस-रात्र मेहनत करणाऱ्या 'इस्रो'चा आम्हाला कायमच अभिमान वाटत राहील, अशा भावना गणेशभक्तांकडून व्यक्त होत होत्या.
'चांद्रयान २' मोहिमेला प्रोत्साहन देण्यासाठी 'लालबागचा राजा'च्या दरबारात साकारण्यात आलेला देखावा यंदा लक्षवेधी ठरतो आहे. शनिवारी मंडळाच्या स्क्रीनवर 'इस्रो आम्हाला आपला गर्व आहे', अशा ओळींमधून शास्त्रज्ञांप्रती अभिमान व्यक्त करण्यात येत होता. त्याला भाविकांकडूनही तितकीच उत्स्फूर्त दाद दिली जात होती. त्याबाबत बोलताना, 'इस्रोच्या अंतराळातील गगनभरारीविषयी लहानथोरांना माहिती व्हावी या उद्देशाने आम्ही चांद्रयान-२ विषयाची निवड केली होती. आज इस्रोच्या शास्त्रज्ञांचा साऱ्या देशाला अभिमान आहे', अशी भावना मंडळाचे सचिव सुधीर साळवी यांनी व्यक्त केली. मुंबईतील परळचा राजा, महादेवाची वाडी, अखिल गोळीबारचा महाराजा यांसह इतर मंडळे तसेच घरगुती गणपतींनीही अशाच देखाव्यांच्या माध्यमातून मोहिमेला सलाम केला आहे. यावेळी देखावे पाहायला येणाऱ्या भाविकांमध्येही चांद्रयान-२ मोहिमेविषयी उत्साहाची लाट दिसून येत आहे.